古天后日誌｜Tesla現價值得追？美股有貨可坐定定

TSLA｜7月20日，有幾陣驟雨，早上局部地區有雷暴，日間部份時間有陽光及炎熱。美股隔晚繼續做好，公布業績嘅公司，市場收貨，股價普遍上升。Tesla第二季營收仍錄得47%增長，減價賣車令毛利受壓，下降至18.19%，股價盤後跌逾4%。睇返Tesla嘅PE仍然高達60幾倍，相對傳統汽車企業股價PE，介乎3至10倍之間，以目前業績預估盈利，其PE喺三年後仍然超過20倍，估值過高下，現價難以再大幅上升，除非公司再有其他新盈利增長亮點。

美股仍能夠喺高位徘徊，更屢破年內高位，全靠企業盈利表現唔係太差，從第1季標普500企業盈利只下降3.3%計算，盈利倒退幅度遠勝預期，第2季至今業績也是倒退不多，估計下半年將步入單位數的正增長。呢個係令投資者對美股愛不釋手嘅原因，只要美國經濟唔陷入衰退，企業盈利交到功課，美股可以繼續高位徘徊，只係目前再大升空間有限，有貨嘅就坐定定，無貨嘅唯有等調整買入。

美匯指數喺100水平爭持，人民幣一度回軟至7.22水平後，今早又再回勇，重返7.18-19水平，料可帶動中港股市反彈。目前內地面對資金外流，外資撤走，以及內部債務問題，中港股市上半年表現落後於全球，雖然市場持續憧憬阿爺出手刺激經濟，問題係阿爺亦無計可施，每每市場傳出有措施出台，港股就短線挾升，噚日北水就錄得過百億元淨流入，主力買入盈富基金(02800)，但咁又係唔係代表北水係睇好，皆因北水依家都係超短線操作，分分鐘今日就走佬，又錄得過百億淨流出。

基本依家港股就係塘水滾塘魚，嚟嚟去去得同一筆資金出山入入，無新資金流入，港股偶有彈升，都只係挾下淡倉，回補空倉已推升指數，話港股轉勢，似乎未有認清形勢。雖然中資早幾年已取得港股話語權，但今年開始外資幾乎全面撤退，少咗外資參與，港股更難回復過往光輝。

近日內地更興起排外心態，批鬥文化盛行，唔歡迎甚至趕走外資成為潮流，其實咁係對經濟發展有害無利。營商者只會計算風險及回報，當經營環境不斷惡化，又被排外及批鬥至無利可圖，你唔趕走外資，外資亦怕怕自己走佬。外資被逼走後，又輪到內鬥不絕，試問咁嘅營商環境下，邊個願意再進入中國市場投資。最搞笑係，中國仍擺出一副高高在上姿態，仍未意識到外資全流走後，有乜嘢嚴重惡果，打開抖音，一片仇外聲音，單靠內循環，中國喺經濟下行，消費降級，及債務危機下，如何扭轉乾坤，古天后相當期待，阿爺仲有乜嘢招數可以出嚟扭轉目前困局。