獨家丨何雁詩曾處產後抑鬱邊緣:老公落街跑步都喊 肉赤鄭俊弘被嘲諷「6億䮛馬」

何雁詩(Step)最近簽約老友張子丰主理的製作公司MOVING PICTURES，成為公司首位女歌手。頭炮新歌《the right kind》由她創作兼監製，藉此表達以名利和金錢來斷定一個人嘅成就相當唔應該。入行14年，一直唔使愁生活又做咗媽媽的Step，對娛樂圈爭名奪利好有感受：「今年係『一姐』、『一哥』下年又未必係，冇乜意思！」另外，對於老公鄭俊弘（Fred）被嘲諷「6億䮛馬」直言好肉赤，更自爆曾處產後抑鬱邊緣，相當危險。採訪：方騫平 攝影：鄧國良 髮型：Green Cheung @ Admix Hairstyling 服裝：SUNCOO

Step想成為兒子榜樣，就算有家庭都唔會放棄夢想。

Step最享受創作過程。

做音樂能帶給她快樂。

就算做咗媽咪都唔會放棄唱歌。

何雁詩的新歌是陀B時創作，從而唱出個人心聲。Step由2009年參加第一屆《超級巨星》出道，14年間經歷人生高低唔同階段，由細公司musicNEXT(老闆係張子丰爸爸張國林)跳到大唱片公司星夢娛樂，2000年自資做獨立歌手，兜咗個圈，𠵱家跟張子丰合作，對加盟新公司有新的目標。

最近Step簽約老友張子丰公司，頭炮新歌《the right kind》由她創作兼監製。

Step新歌MV都親力親為。

新歌MV都好揼本。

Step曾做過獨立歌手推出歌曲。

Step跟張子丰(後排左3)係多年老友。

Step陀B時有唔少創作靈感，令懷孕過程增添唔少快樂。

被力捧時有心雄

30歲的Step直言現階段唔再追求做「最佳女主角」及「女歌手」金獎，反而想得到共鳴，做想做嘅事，同屋企人一齊感受生命：「以前喺大公司時連續有幾首NO.1歌，勢頭咁好都心雄過；亦都試過做乜都俾人鬧爆(感情問題)，經歷幾個階段感受到爭名奪利原來唔適合我，亦冇奢求過，所有爭『一姐』(同期戰友吳若希、菊梓喬)都唔關我事，我從來只係局外人，齋睇唔會參與，所以確定要搵一個適合自己模式嘅公司去運作。」她以旁人角度睇爭『一姐』、『一哥』認為冇乜意思：「今年係『一姐』下年又未必係，咁爭嚟仲乜？只會自己辛苦，真係唔係好啱我，我嘅快樂建基於做音樂嘅過程，可以主宰到有更多參與度、團隊適唔適合自己、今年寫幾多首歌等，其他事控制唔到。」

Step同期星夢戰友吳若希、菊梓喬爭崩頭做「一姐」，兩人不時互寸。

相比吳若希、許廷鏗、老公鄭俊弘等，何雁詩直認唔得寵，永遠係靠邊站。

兩年前何雁詩以獨立歌手身份上《勁歌金曲》唱新歌《灰夠》，卻成為箭靶被尖酸刻薄的DJ陳海琪評擊到爆喊。

2017年4月已有未婚妻嘅鄭俊弘被爆與何雁詩戀情，Step面對好大壓力。

被老公父愛感動

作為人妻及人母，但Step絕非以家庭為重，她表示產後受荷爾蒙影響，頭半年注意力會集中囝囝Asher，兒子經已14個月大，想分配好啲時間：「其實我完全留喺屋企，對自己及小朋友未必係最好選擇，因為我好容易過份緊張，就如BB今日冇便便就會好焦慮，如果放手畀老公及家人湊，自己做音樂嘢，做媽咪心態會平衡啲。」儘管Fred恨追B恨到出口，但也會撐老婆做音樂：「講真如果我焦慮、擔心及唔開心，喺度咿咿哦哦，最後煩住嗰個咪又係佢！佢見證住我寫歌時嘅歡樂，點都會全力支持。」暫時Step要高度設防嚴禁發生「意外」：「見爸爸咁錫小朋友，作為媽媽會俾佢感動到，成個人都溶晒，𠵱家關係變得更好。」

兒子Asher跟鄭俊弘係餅印。

14個月大囝囝Asher好得意。

Fred本來冇諗過咁快做老竇，但𠵱家父愛爆棚，仲心急追多個。

好有愛。

兩父子常有互動。

Fred懶理被嘲笑

兩公婆由拍拖初期到婚後共渡好多難關，Step自爆最難過日子，是小朋友剛出世頭3個月：「以往為老公付出多啲，會煮早餐佢食、車佢開工，但產後唔識得平衡照顧時間，加上受荷爾蒙影響變得躁底，頭兩周變得好迷失處於產後抑鬱邊緣，就連就算有陪月，Fred行開一陣落街跑步，我都會擔心被離棄狂喊，佢會默默聽我哭訴，原來作為產婦需要身邊人陪伴，經此一役明白到要冷靜理解自己所需，清楚溝通就能解決好多問題。」對於Fred被嘲諷改花名「6億䮛馬」，Step坦言作為老婆當然唔鍾意老公俾人話：「我哋入咗行一段時間，我會理解其他人嘅意見，但我都有我嘅意見，控制唔到就算，佢反而唔多在意。」

Step見老公攬啜兒子，會呷囝囝醋，要求錫埋一份。

產後頭3個月受荷爾蒙影響，Step需要老公日夜陪伴。

產後頭兩個月就算有陪月姨姨，Step都要求老公陪到實。

Fred自2020年娶Step後，被網民嘲諷係「6億䮛馬」。

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ