頭條戲場丨《鬼咁多大屋》笑出聲的合家歡恐怖片

英文片名叫《Haunted Mansion》，即係迪士尼樂園最受歡迎的經典鬼屋遊戲。迪士尼以先進CG特技，將本來俾人玩嘅遊戲升級兼改裝為驚嚇刺激又搞笑的歷險電影。雖然話翻拍自2003年，Eddie Murphy主演的同名電影，都係有鬼屋有鬼然後被嚇，但新版豐富好多，加咗一堆金像巨星，Owen Wilson、Jamie Lee Curtis、Jared Leto及Danny DeVito等，一屋好戲之人，齊齊講經又山寨式驅鬼，對白極膠，真係全場Keep住笑出聲。(上映中) 撰文:廖思慧
 

驅魔雜牌軍，冇能力趕走惡鬼，唯有智取。

就係呢間平過市價好多嘅大屋，見到都唔想入。

電影Sell驚嚇但迪士尼出品都唔會驚得去邊，想睇失驚無神恭喜你，又想嚇出一身汗嘅，呢套未必滿足你。單親媽媽Gabbie (Rosario Dawson飾)同9歲囝囝Travis(Chase W. Dillon飾)搬入一棟低於市價好多好多嘅大屋，平嘢冇好定律嚟嘅，入屋逗留一陣已知瀨嘢，速逃後第二日被逼回歸。

單親阿媽同囝囝，後者由好驚變得勇敢，好感動。

法國嚟嘅通靈大師，一開口就好多廢話，但有料嘅。

呢位厲害，重點推介角色，全片MVP。

因為要知大屋歷史先可以對付惡鬼，有心臟病嘅佢湧住幫手。

高分娛樂片
Gabbie日日被嚇，加上個仔超級淆底，惟有搵人幫手，分別搵嚟宇宙級講經天才，流流哋牧師Kent(Owen Wilson飾)、喪偶灰爆超自然專家Ben Matthias (Lakeith Lee Stanfield飾)、法國七師傅，通靈大師Harriet (Tiffany Haddish飾)及有心臟病唔嚇得的歷史學家Bruce (Danny DeVito飾)，雜牌軍組成驅魔大隊奪回大屋，過程當然好論盡同尷尬，但同時非常好笑。

大屋有好多鬼，仲要乜國籍都有，好熱鬧。

Jared Leto飾Hatbox Ghost，睇完戲都唔知係佢。

被困水晶球好多年嘅靈媒KOL Madame Leota(Jamie Lee Curtis飾)

電影較預期好睇，特效出色，惡鬼離開大屋恐嚇雜牌軍最精彩，半夜晒冷式嚇鬼非常繽紛，加上全片有好多笑位，小笑大笑甚至令你翻笑都有，宣傳唔多認真可惜。

電影上映中。

《星島頭條》新網站有更多精彩內容：http://www.stheadline.com/