古天后日誌 ｜港股場內只餘炒家 北水彈出彈入成常態

港股｜8月17日，大致多雲，有幾陣驟雨，下午局部地區有雷暴，日間天氣酷熱。美國經濟數據不僅反映美國經濟唔係差之餘，更要留意通脹於稍後時間會否回升，而7月份FOMC紀錄表示有需要時再加息，10年債息升至4.28%，重返去年10月高位附近，美股先升後回，三大指數下跌。道指跌180點，標指跌33點，逼近4,400點大支持位，失守下個支持要去到4,300點。

美匯指數回升，人民幣持續走弱，睇返中國持美債數量降至14年新低，目前只持有8,354億美元美債，過去一年減持速度便達到1,000億美元之多。今年外資直接投資金額創新低，徹資速度更加係前所未見咁高，外資徹走係需要兌換美元，為換取更多美元，外管局唯有喺低位拋售美債套現。去年中美貿易順差係3,829億美元，但同期外管局美元進帳，反而要拋售1,000億美元美債，反映美元流失速度較預期中嚴重，人民幣跌至7.33至34水平。

美元流失原因主要係外資徹走要兌換美元離開，其次係美國重組生產線，去中國化，中國廠家做不住，本來喺中國生產線，移走去東南亞設廠亦需要提走大量美元。若中國所持美債水平偏低，會嚴重影響外資對中國及人民幣嘅信心，進一步加速人民幣貶值。

人民幣弱到咁，中概股當然無運行，噚日收市後，騰訊（0700）公布業績，收入增長欠缺動力，盈利大升主要是去年基數低，但過去靠「育成」初創致富嘅輝煌日子已一去不返。

其實阿里（9988）交出一份咁好業績，一樣係高開低走，說好的重上紅底股只係曇花一現，咁騰訊平平無奇嘅業績，自然唔會吸引到資金入場，股價唔跌都偷笑，博業績後上升，似乎贏面唔高得去邊。港股成交持續低咪，基本場內只有炒家，沒有真止買家，就連北水都彈出彈入，變成炒家，港股有乜辧法唔係只有波幅，沒有升幅。

 

相關新聞：

港股市況｜港股創今年新低 恒指一度跌穿萬八點 通脹風險未除 儲局暗示或再加息

騰訊次季多賺33%勝預期 視頻號使用時長近翻倍

---

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ