古天后日誌｜ 中央出組合拳決心救市 中港股市有望回穩 恒指一個位料有阻力

9月4日，部份時間有陽光，局部地區有驟雨，日間炎熱及乾燥，未來一兩日天氣轉壞。上周五美國公布失業率，意外回升3.8，美股先高後低，道指升115點；標指升8點，納指倒跌3點。美股暫時喺高位整固，VIX回落至13水平，反映市場沽壓唔大，暫時美股唔似會大幅調整，反而係每次回調都見有買盤趁低吸納。

美股上週五先高後低，其中一個原因係美聯儲委員Mester指雖然失業率回升至3.8%，但仍然很低，勞動力市場依然強勁，呢個言論係暗示仍然有機會加息。不過市場預估年底前再加息機率，已由早前超過50%回落至32%。不過息口已接近見頂，但係高利率已令更多公司放棄招聘，美國就業市場已慢慢轉弱，當失業率升穿4%，屆時美聯儲要討論係幾時減息而唔再加息。

周五晚中概股表現強勁，蔚小理表現突出，蔚來反彈7.1%，小鵬曾升至11%，收市只升5%。中概股炒作似賭場，睇下拼多多就知，整個8月份股價由92.79美元回落至75.44美元，一個月內回落幅度達18%，但績後又爆炒上103美元，其後喺一星期內急升35%，買中概股如同入賭場買大細，股價升跌純看莊家心情。

人行上周五公布9月15日起將外滙存款準備金率由6%下調至4%，人民幣滙價應聲急彈逾300點子，帶動A股做好，上證指數喺上周五香港打風期間報升，預期升勢今日可持續。至於港股喺新加坡黑期亦重上18,600點水平，預料今日港股將高開。

阿爺使出政策「組合拳」，為刺激資本市場多招齊發，再加埋救內房嘅一系列措施A股應聲反彈，可望帶動港股氣氛。恒指8月跌咗1,700點或8.5%，家下阿爺發功出招，暫時中港股市可望回穩。若然9月首個交易日高開高收，成功企穩20日線約18,477點，即市主要阻力為18,700點及50日線18,898點，提防50日線遇阻，加上8月中遺下裂口18,800點至19,100點左右，應該會有一定阻力。

相關文章：

金發局倡審視股票印花稅 「考慮與國際慣例接軌取消徵收」 李律仁：需回應投資者

---

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ