梁朝偉威尼斯凱旋而歸 認對金獅奬流晒口水終圓夢：對自己有交代
2023-09-08 12:42 
梁朝偉早前成為首位華人演員獲《第80屆威尼斯電影節》頒發「終身成就金獅獎」，今日他在黑雨的情況乘早機返港，大批傳媒已在機場等候，約早上9點18分，身穿牛仔衫褲、精神奕奕的梁朝偉拿着金獅奬與太太劉嘉玲一同現身機場貴賓室通道，而梁朝偉亦開心地捧奬讓傳媒拍照。
【相關閱讀】：威尼斯影展丨梁朝偉成首位亞洲演員奪終身成就獎 台上罕有激動爆喊全因李安致辭
【點擊睇梁朝偉返港】：
受訪時，梁朝偉指今次得奬的感受與過往不同，因今次感受41年來的努力：「最感動係上到台啲人企晒起身鼓掌，覺得好似係自己對自己有交代，我成日覺得做咁多年嘅努力，做咁多嘢，一個人平時待人接物做嘢，唔係對人交代，係對自己有交代，嗰刻覺得呢41年總算係對自己有交代。」提到上台後感觸落淚，梁朝偉表示因當刻台下的人全部企起身：「李安講時，我喺現場做嘢，我無意識到我係點，經過佢講發現原來我係咁，聽到已經有少少（想喊）。」他指因台下全部也是電影人，全部起身鼓掌好耐，所以感受很不一樣。問到由李安頒奬是否更加感動？梁朝偉說：「唔係，係好多樣嘢加埋，唔係一樣嘢。」
與眾分享榮譽
對於得奬後被指為港爭光，梁朝偉指電影不是一個人，而是team work及團體工作：「我諗咁多年來由我做電視台開始，由畀機會我做《430穿梭機》，受好多好導演啟發有機會拍《新紮師兄》，其實杜琪峯導演都啟發我好多嘢，唔通個獎又唔係屬於佢哋嘅咩，茶水同服裝又唔係屬於嗰個人，所以我覺得係大家成就咗我，我好彩我上去攞。（所以你送個獎畀香港？）我覺得係屬於大家，應該大家一齊分享，因為呢幾十年裏面，由1982年到2023年，大家一齊合作過好努力向住一個理想進發，今日得到係每一個人都有份。」
對於李安大讚他的眼神，梁朝偉指自己只是在工作，沒有留意：「我只係意識每次角色同演出我都做咗好多準備，當然內容會好豐富，你睇一本書同一百本書好唔同，唔係眼神而係你成個人嘅信心都唔同，即係當時我拍《一代宗師》，如果唔係練咗咁多年你都冇嗰個信心，你冇呢種眼神，你係經過時間同訓練先有個信心。」
至於金獅獎是否他的目標？梁朝偉承認很久以前已想拿這奬：「我同威尼斯電影節的關係從1989年開始，那年是候孝賢導演的《悲情城市》第一次拿最佳電影金獅獎，當時我有些事並沒出席，跟住與陳英雄導演的《三輪車伕》拿到，最後一次《色·戒》同李安去攞，但我哋好趕，未等到頒獎，我同李安、湯唯就去咗多倫多國際電影節做宣傳，當李安聽到得獎他就回去攞獎，當時我哋食晏，擺咗個奬喺度，跟住（李安）話大家嘅、大家嘅，我望到個奬，嘩！流口水呀，如果有機會就好喇，但這些不是你想就有，係好彩囉！」
【點擊睇梁朝偉揚威威尼斯】：
不為攞獎拍戲
梁朝偉指之後會與媽咪及朋友食飯慶祝，但就不會搞慶祝派對，問到下個目標是否奧斯卡？他指現在拍戲想法不同了，就像回到最初拍戲的初心：「而家盡量去享受一班人一齊的旅程，拍戲九個月裏邊怎樣準備個角色，同一班人盡自己最大的能力做到最好，呢個先係最好玩嘅地方。」梁朝偉又指即將拍的歐洲片，已沒有像以前般想着如何突破，只做好前面的事，不會為獎項，因為有心就會做得好；又透露明年3月會到德國為新戲開工。
至於會否加片酬？他即顯得有點尷尬，問是否要問劉嘉玲？梁朝偉說：「其實主要睇係咪好鍾意，呢個階段我覺得開心最重要，拍一套戲同一班人開心緊要過你畀筆錢我。（點解公開多謝太太？）佢咁多年一直默默支持同鼓勵我，我覺得我從來都冇多謝過佢，所以都應該趁呢個終身成就獎講一講。（放手畀你做你鍾意嘅事？）都係，因為最後都係我決定，套戲係我去拍，唔係佢，到最後我認為好鍾意，即係點解我會接部歐洲戲，第一亞洲拍過好多、荷里活片又拍過，歐洲未拍過，咁啱有個導演為我度身訂造，我睇完佢嘅作品都屬於係一個好優秀嘅導演，我同佢做咗幾次Zoom，你覺得佢係一個可以信任嘅人，佢係好有修養但謙虛，等於我上次接《尚氣》都係因為同個導演做Zoom感受到個人好真誠同可靠，今次都係覺得咁。」
見黃偉文再闖樂壇？
梁朝偉透露今次的角色學術性較強，是一個腦神經科學家：「我兩個月前已經喺香港同大學搵晒腦神經專家做研究同搵咗一堆書，講德國請我講學，所以基本知識要有，因為要講課，所以我今次計劃用八個月去準備，我一日睇四至六個鐘頭書，我又唔係專業嘅人，所以睇得慢，睇唔明我好多謝香港幾間大學嘅腦神經科學家同腦方專家咁支持我，好多時話『如果你睇唔明話畀我聽，我再解釋』。」問到今次是否抽空見黃偉文（Wyman）？他指因沒直航故去了英國轉機，剛好有共同朋友請食飯慶祝，才見到對方。問到甚麼時候會再唱歌？梁朝偉即笑說：「鬼有人聽咩！」
提到早前亮相韓國女團NewJeans歌曲《Cool With You》MV，梁朝偉表示NewJeans唱片公司的老闆剛好認識他一個認識多年的朋友，所以通過他的朋友找他：「我識呢個朋友好多年，1997年係我翻譯，我去韓國做宣傳都係佢幫我做翻譯，因為我唔知佢想拍咩，所以叫佢send故仔畀我睇同send歌畀我聽，我話如果你可以滿足我三個條件就拍，第一，我喺邊你就喺邊度拍，第二，我個造型你唔可以管，因為係我創作角色，當然有我自己諗法，第三就係我只係得兩個鐘，因為基本上佢成個MV喺西班牙拍咗，嗰時我喺東京，佢哋就飛咗去東京用綠佈景拍，因為我得幾十秒。（有冇做咗NewJeans fans？）好似佢哋係我嘅fans！」訪問後，梁朝偉在閒聊表示不知道香港黑雨，當大家笑指他是貴人招風雨，他即表示「唔係」，又指到港後看到影片後才知道雨下得那麽厲害。
【其他文章】：
威尼斯影展丨梁朝偉獲頒終身成就獎前偕劉嘉玲遊水都放閃 網民「讀唇」讚細心
威尼斯影展丨61歲梁朝偉興奮坐船青筋皺紋暴現 大風吹襲髮線後移仍魅力不減
威尼斯影展丨梁朝偉變「攝石人」美女網民被轟無禮貌 結局180度反轉與劉嘉玲有關
釜山國際電影節丨周潤發獲頒亞洲電影人獎！ 連續兩屆香港影人獲殊榮
劉嘉玲揭老公扮「社恐」真相 見好姊妹上山詩鈉偷吻梁朝偉即問罪
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應