獨家丨新秀梁浩賢力捧變「執笠歌手」致抑鬱 古淖文借《中年2》發埋下半場明星夢

TVB公布的《中年好聲音2》108強入圍名單，包括2000年無綫《華人新秀歌唱大賽》冠軍梁浩賢及2009年亞視《亞洲星光大道》第5名兼「台風獎」古淖文。2001年，梁浩賢只出過一隻碟，華星唱片就清盤；至於亞視出身的古淖文就不甘俾人睇唔起，聽到張家輝的經典對白「x你個街，亞視嚟㗎喂！」都唔多高興。因為未紅過，又或歌手路突然急停，兩人為證明自己實力，唔怕被恥笑努力發埋下半場明星夢。採訪：方騫平 場地：Amelia Hong Kong(古淖文)、悅火爐端燒(梁浩然)

35歲古淖文係完美主意者，至今仍未揀啱對象。

42歲梁浩賢近年從商，已有固定女友，但想建立多啲事業才成家立室。

「永恆亞視」熄燈後，6年前古淖文經已跟情如母子的肥媽表明想過檔TVB，但當時肥媽未有安排。今年35歲的古淖文啱啱夠「秤」符合「中年」界別，未跟肥媽商量已衝去報名；42歲的梁浩賢反而逃避「中年」兩個字，加上有歌手框框怕輸故猶豫了一年，終被周吉佩例子打動，想借唱歌來幫助事業。

今年35歲的古淖文啱啱夠「秤」符合「中年」界別，即參加《中年2》。

希望肥媽畀分鬆手

有《中年2》評判肥媽加持，問古淖文是否有著數？他堅持唔打攪阿媽：「咁阿媽都要公平嘛…但如果佢肯鬆手少少畀我，哈…我控制唔到佢，就算佢公開批評我都係想我進步，雙贏喎，一樣開心。」對被指係大熱門，古淖文唔會畀自己壓力：「評論好壞都有，大致都係話我『唱咗咁耐唔紅，死咗條心啦』；睇完得啖笑咪算囉，唔好受打擊，反而有啲讚我唱得好、Keep得好，坦白講我一定係發明星夢，仲由細發到大，今次當係發埋下半場，而且經歷疫情嘅危危乎生活，更想有多啲人認識，得到更多工作機會。」

古淖文半紅不黑浮沉娛樂圈14年，望挑戰《中年2》發埋下半場明星夢。

古淖文跟肥媽情如母子，但今次參賽就唔敢打擾肥媽。

古淖文直認好貪靚，捨得花錢做健身及做fancl。

少時一炮而紅好寸

談到入行14年辛酸史，古淖文直認當年亞視皇牌節目《星光大道》雖然撼贏TVB《超級巨星》，但喺亞視出身依然被睇低一線，甚至俾人睇唔起及受白眼：「恥笑亞視嘅金句有好多，如『前世做錯事，今世做亞視』，就連亞視出身嘅張家輝都咁話啦，哈！就算我前世做錯事，喺亞視嗰4年都還晒啦。年少一炮而紅，難免心高氣傲，個人仲有啲寸，對於人哋睇唔起自己，只會同自己講『好快就會跳出框框，一定會紅』點知𠵱家都半紅不黑，踏入中年仲寸乜鬼，只求不斷有進步。」

 

古淖文跟影帝周潤發拍過電影《賭城風雲》。

古淖文跟《亞洲星光大道》戰友相聚，當中包括冠軍羅力威及陳蕾。

古淖文係2009年亞視《亞洲星光大道》第5名兼「台風獎」。

華星清盤打回原形

另外，2001年華星唱片清盤時，雖然有「一哥」古天樂「陪葬」，但梁浩賢仍然傷到入骨：「以前有公司時，每次活動都有助手及保母車，仲Set晒頭行出嚟型到爆，感覺好似好得喎！冇咗唱片公司後乜都冇，連歌迷都越嚟越少，突然間戇居居失咗方向，甚至開始抑鬱匿埋屋企，但都hea咗10年，期間做吓pt DJ炒吓散『揼波鐘』，直至冇晒積蓄先肯死心轉行做生意，賺到啲錢後又唔想有變動，不過始終心繫唱歌，得到吉吉鼓勵，點都要盡力試一次。」

2001年華星唱片清盤時，梁浩賢仍然傷到入骨。

梁浩賢當年獲華星新秀金獎，有10萬獎金。

梁浩賢(左2)和徐天佑、余文樂及周永恆是同年新人。

浩賢當年都有啲粉絲。

回顧過去，浩賢有好多難忘點滴，最後悔當年太被動，唔識得把握受捧機會：「試過錄音遲到；有次仲傻到以為半夜兩點出街嘅《音樂新幹線》係直播，錯過咗下晝兩點嘅錄影又被鬧，去Event影大合照時永遠企側邊。我又成日去老友譚俊彥（Shaun）屋企，『笠』咗佢頂帽及佢件衫嚟着，反正佢有咁多衫都唔覺眼㗎啦，直至見報後阿Shaun 莫名其妙，點解我身上套衫咁熟面口嘅？諗返都好笑。」

梁浩賢及「光頭仔」王嘉明成為《中年2》戰友，笑言當年都係做到唱片公司執笠。

梁浩賢鼓起勇氣再戰歌唱比賽。

當年梁浩賢跟鄧健泓、梁詠琪、李彩華合唱。

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ