杭州亞運｜「劍神」張家朗為香港劍擊隊帶來「零的突破」 仲有乜所求？
2023-09-24 21:28 
張家朗神劍無敵，周日決賽以極輕鬆姿態贏國家隊對手，勇奪杭州亞運男子花劍金牌，為香港劍擊隊帶來亞運金牌「零的突破」，真正港人之光。
張家朗輕鬆殺入8強，以15:7挫國家隊許杰，之後4強遇上真正考驗，面對日本代表敷根崇裕，曾經落後7:10，劍神再發揮特強心理質素，以15:14反勝對手入決賽。
去到決賽，張家朗放鬆心情下與國家隊陳海威相鬥，家朗不斷主動出手，打完首節、不足2分鐘已經大幅贏15:2，技術性擊倒對手贏走金牌。
張家朗賽後說，今屆亞運學會適應不同情況，有時候狀態不太好，如何在比賽時調整。家朗說：「最難打反而是4強對敷根崇裕，一來落後，二來對方是好劍手，很好彩可以追得返。」
劍神奪金多圖睇
提到下個目標，張家朗說當然希望想在團體賽拿金牌：「亞運賽事不計奧運積分，但對手中、日、韓仍會full team上陣，當然想去借比賽了解對手，借此準備未來世界賽，中日韓香港這4隊水平好接近，屆時勝負要看當日發揮。」亞運男子花劍團體賽，將在9月27日上演。
現年26歲，家朗近兩年踏入大熟大勇境界，登上世界之巔，2021年東京奧運，7月26日打入個人花劍決賽，成功奪得香港歷史上第2面金牌；2022年1月，在男子花劍世界盃巴黎站，成為首位贏得男子花劍世界冠軍運動員。
2022年4月18號，成為香港首位男劍手登上世界第一，今年8月亦在世界大學生運動會登頂，劍神即係劍神。
至此，張家朗集齊奧運、亞運及世大運3項大賽金牌，是首位本地運動員達到此一殊榮，只餘世界劍擊錦標賽個人金牌仍未到手。如果畀佢贏埋，劍神仲有冇所求？
-----
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應