星8卦｜「斯文」靠相睇嫁錯郎主動離婚搞到情緒病

2023-10-06 11:00

「斯文」份人其實好好，但衰在悶同埋無乜情趣。論家底都唔錯，但一直唔想同圈中人，無咗同聲同氣靠相睇識到而家個老公，又真係有難處。最難搞係而家個老公太老正，對於「斯文」嘅行業真係唔多理解，見佢成日同唔同嘅男人合作，返到屋企就黑晒面，「斯文」解釋又唔聽，久而久之令到「斯文」覺得好大壓力。另一個問題出現係「斯文」嗰位巴渣奶奶，覺得自己個仔應該娶個更正嘅女人，而唔係娶個戲子囉。每逢有人嚟屋企食飯，一定要「斯文」喺屋企幫手，仲要做埋工人嗰份，出出入入好鬼忙。

當有人讚「斯文」賢淑，奶奶就會講埋啲唔三唔四嘅歪理，目的係要話畀人知呢個新抱唔係自己想要嘅，當初係個仔無諗清楚，又想成家至娶返嚟。而「斯文」聽聽埋埋梗係唔開心，所以出去叫公司畀多啲嘢做，咁連鎖反應梗係老公唔鍾意，加上阿媽唆擺，最絕係介紹朋友嘅世侄女畀阿仔識，話男人可以揀個再好嘅，結果喺「斯文」發現一家人都咁樣對自己，終於死心，主動提出離婚，奶奶梗係好高興，但老公就覺得無面，決定要拖住「斯文」，但自己又係咁識其他女人，處於呢種膠着狀態，「斯文」情緒好差，開始要去睇心理醫生自救。