玉澤演舉行韓星史上最寵粉FM 兩個半鐘唱足9首歌落台8次任Fans狂攬

2023-09-30 17:45

韓國男團2PM出身，成功由idol轉型藝人的玉澤演，在韓綜《一日三餐》喪吸媽媽粉，劇集《打架吧鬼神》及《黑道律師文森佐》等亦深得觀眾喜愛，熟知澤演的Fans都知偶像好nice，同一般韓星超級唔同，架子係零，但估唔到可以去到任攬程度。昨晚澤演在九展Star Hall舉行人生首個《2023 OK TAECYEON in HONG KONG : SpecialTY》粉絲見面會香港站，唔只唱廣東歌，尾聲更大唱2PM的《Champagne》、《Promise(I'll Be)》及壓軸全場大合唱的《Hands Up》，全個FM有數唔到咁多高潮位，叫以後啲韓星點跟?採訪:廖思慧

澤演又唱又跳《Magic》、《Anyway》揭開序幕

澤演舉行人生首個FM香港站

唱跳完即以廣東話打招呼

搭正八點，穿上開胸黑衫及黑褲的澤演又唱又跳《Magic》、《Anyway》揭開序幕，展現2代團的精湛實力。唱畢瘋狂流汗的他以廣東話跟HOTTEST（粉絲暱稱）打招呼︰「大家好，我係玉澤演，好開心見到大家，好掛住你哋，歡迎大家嚟到Special tour，希望大家度過歡樂嘅時間，開始之前為大家介紹今日嘅MC。」

澤演坐咗一段時間都仲流緊汗

話明粉絲見面會，重點當然是跟粉絲有無限互動，澤演有別一般韓星，同粉絲互動量達到宇宙級。

寵粉之一任攬

FM前粉絲們在memo紙上寫下願望，澤演隨意抽出再給予實現，大部份Fans都是求合照及攬攬，澤演唔只做到足，仲要跳落台下，走到幸運Fans面前自拍加抱抱，有求必應之餘仲要惠及冇份抽到嘅粉絲，可以近距離接觸偶像，路過仲可以擊掌兼互動做心心，FM開始冇耐已經去到第一個高潮位。

揀完幸運FANS即落台實現願望

落台搵FANS合照

好近呀

好幸福又好冷靜嘅FANS

任攬行為相當不得了

不忘同旁邊粉絲畀心心

仲可以擊掌

寵粉之二乜都講
玉澤演在第二個環節分享了三張拍戲時的照片，一張是劇集《為你心動》中的吊威吔的片段，他坦言：「其實我有畏高，所以都唔知道嗰時係點拍。」又提到自己鍾意夏天拍攝，多年前拍劇集《Dream High》，因為太凍連對白都講唔到，甚至唔想落車，仲話要克服環境因素好難，所以之後好幾年都夏天先拍劇。不過，因為拍劇通常要拍7至8個月，所以笑言點都會橫跨兩季。

大講拍攝趣事

寵粉之三唱廣東歌
外國人講廣東話已經難，仲要唱廣東歌，不過難唔到高材生兼語言能力超強的澤演，特別為FANS演繹馮允謙的《給缺席的人唱首歌》，他稱廣東話發音同韓文完全唔同，非常之難：「喺屋企一邊聽一邊練，工作人員標記韓文發音，但我一聽已經知唔標準，當中ngo最難發音，如果有唔準嘅地方請多多包涵。」雖然咬字的確唔準但誠意加感情搭夠，連原唱者Jay Fung都好驚訝，認為首歌本身已經唔易唱，但澤演勇於嘗試，非常讚賞。

澤演真係好有心

原唱者都轉發片段

仲讚好

寵粉之四送禮有「味道」

第三個環節「Special thank you」，澤演在透明杯及T-shirt上畫畫再簽名，更扮飲透明杯一啖，全場大叫，最後更親自沖咖啡，並裝入畫滿圖案加簽名的保溫杯，同樣飲咗一啖再送畀粉絲，全場停不了的尖叫。

為透明杯加圖案

加完仲扮飲

喺黑色TEE簽上中文名

留意返,件衫澤演著過上身再除出嚟送畀FANS,好羨慕呀

寵粉之五人型太鼓之達人

FM玩足兩個半鐘至10點半，唱足9首歌落台8次送禮的澤演說︰「好開心，好耐無嚟過香港，粉絲依然好熱情。中秋係跟家人團聚嘅節日，今晚粉絲成為我嘅家人，永遠唔會忘記2023年嘅中秋喺香港度過。」最後歡送環節，澤演在出口處同FANS逐一拜拜，更會對應FANS的動作兼有眼神交流，如人型太鼓之達人，仲要光速進行，難得佢仲笑容滿面。完成FM，佢仲極速開IG LIVE品嚐香港FANS CLUB送贈的麻辣味啤酒，離開時又同在停車場等候的FANS打招呼，甚至上車後駛離九展時見到有FANS在路旁，都校低車窗，停一停同FANS講拜拜，寵粉之霸當之無愧。