專欄｜漸漸甦醒 獅子準備咆哮

車路士近期開始逐漸成型，而且更取得2連勝，究竟佢哋係點樣調整？同大家睇吓領隊普捷天奴點樣可以將呢隊車路士起死回生。

陣式上，普捷天奴絕對唔係用哥迪奧拿嗰套3421，而係用番佢最純熟嘅4231。由一開始好保守，先由利維高維爾開始打左閘，跟住用芝維爾打左翼，及後知道球隊入唔到波，戰績未有改善，肥普就作出改變，開始出番梅迪歷加強左翼嘅推進能力，同時將安素費南迪斯同干拿加歷查調位，效果顯著，因為將加歷查擺喺10號位，就可以推前條防線，加強攔截能力，而安素被安排褪後一格就令佢嘅長傳能力得到釋放，自然在組織上就可以靠佢嘅長傳令更加多波放到入進攻三區。

然而車路士始終欠缺埋門能力，英超總共19次創造機會，只少過第一嘅紐卡素4次，可惜場均入球轉化率1.4僅排聯賽第9，直接令車仔成績有所影響，尤其前鋒尼高拉斯積臣都係相對幼嫩。

雖然入球效率低下令到車仔位列聯賽榜下半版，可幸防守方面真係幾穩固，近期作出好大改善，聯賽場均只係失0.9球，僅僅落後曼城同阿仙奴。

每場比賽都可以睇得出肥普絕對係由後場開始建立，希望以唔失波為先，有時候亦執着地要從後場搓好多板，不過車路士始終都係青春班，係要一啲時間慢慢去打磨。但3個中場分工定位都逐漸清晰，隊波亦建立緊爭取勝利嘅心態，加上傷兵逐漸回歸，所以深信沉睡中嘅獅子最尾都會醒返。Willhappy

-----

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ