古天后日誌｜阿爺繼續出招 可惜外資已撤返魂乏術

10月24日，部份時間有陽光，未來一兩日天晴。隔晚美股表現反覆，早段因為10年債息升穿5%，美股低開，但做空美債嘅對沖基金開始平長債空倉，令美債息回落，美股一度反彈倒升，尾市升幅收窄，道指跟標指仍要跌190點及7點；納指升幅則收窄至34點。

由於以巴衝突情況仍然嚴峻，VIX一度高見23水平，及後油價落為回落，VIX跌回20水平左右，反映美股仍有沽壓。以巴衝突已逾一星期，市場焦點再從以巴衝突轉向下週三聯儲局議息結果及公司業績，目前工資有所回落，未來通脹將會喺3%至4%徘徊，當息口高過CPI嘅2%，應可有效壓抑經濟增長，聯儲委員都係銀行家，即係生意人，生意人一般唔會咁傻主動催毀經濟。

暫時美息應該開始轉趨穩定，反而係日本央行會否加息成為另一變數，之前日本央行已容許波幅向上移，暗示日本或有加息可能。由於日本係目前唯一仍然低息提供低成本資金嘅地方，若日本都加息，或有機會令資本市場流動性收緊。

蘋果公司在170美元下有承接

業績方面，今晚輸到可口可樂、微軟及Google等公布業績，明晚則輸到阿馬遜。Tesla業績後一度低見202元，古天后曾於直播節目上提到，業績後Tesla 200至220美元可收集，不過Tesla估值唔平，可能反彈至240至260元會有沽盤食糊。而蘋果公司喺170美元下有承接。雖然蘋果跟Tesla嘅現價估值唔算平，但明年下半年預期減息下，呢兩間龍頭公司仍值得回調時低吸。

週一港股休市，A股3大指數再跌1.47%至1.69%不等，上證失守3,000點大關，創指跌至1864點，跌至2020年疫情底，成交7,220億元。收市後阿爺再度出手救市，匯金再購入指數基金ETF，並強調日後會繼續增持。受消息刺激晚上中概股普遍造好，恒指ADR收報17101，較週五收市跌70點。

明日特首發表的《施政報告》，未知會否有利好股市消息，今日港股繼續考驗17,000點心理關口，若然失守將下試16,800點尋找支持，即市反彈上日收市價17,173點至17,200點為今日大阻力。缺乏成交支持下，反彈力有限，本周反彈至上周五高位17,310點已算唔錯。

---
星島X理大攜手推動永續發展 「ESG認證計劃暨嘉許禮」2023  把握報名機會 https://bit.ly/45kDhn5

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ