古天后日誌｜港股具備反彈條件 待好友發動反擊攻勢

11月2日，大致天晴，日間乾燥。隔晚聯儲局議息，一如預期唔加息，而鮑爺無再放鷹，只不過佢老人家強調咗「目前完全沒考慮降息」，此等言論表現佢未有放鴿，但目前唔減息，唔等於之後唔會減，只係要繼續壓抑通脹，鮑爺當然唔會咁輕易放鴿。雖然唔減息住，但利率期貨顯示，12月加息機會進一步下降，美股三大指數上升，道指升221點；標指跟納指分別升44點及210點，息好敏感股做好。標指升上4,200點，但目前美股估值仍偏高，市場唔願高追，不過空軍已逐步撤退，能守住呢啲位，美股喺年結12月會做返好少少。

美國第三季 GDP出現強勁增長，除咗係上半年股市做好，帶來財富效應，更多人願意喺暑假期間出外消費，帶動起酒店和餐飲，但呢個季節性因素，會隨住9月返開學而減退，估計第四季難再有4.9%高速增長，可能會回落至3%以下。至於小非農新增職位降至11.3萬人，遠低於預期15萬。過息口高企，令缺人行業如酒店及餐飲，開始減少招聘，職位空缺少於千萬份，工作減少令更多美國人唔敢太頻密轉換工作，就業人數喺未來數月會進入低增長期。

若收市高於周二高位 有望扭轉弱勢

另一項數據係工資增長，轉工工資增速降至8.4%，年初時係講緊10%以上，而平均時薪加幅亦放緩至5.7%，為24個月來最低。工資增速係最直接推高物價，一旦民眾收入減少，自然就削減開支，需求減少令企業放緩擴充速度，未來就業市場將逐步放緩。小非農主要反映私人招聘市場，周五大非農數字包含更多政府招聘，但喺美國財赤擴大之際，職位招聘正縮減中，政府考慮如何削減開支，而唔係花更多錢請人。

噚日港股表現牛皮，順利過渡隔晚議息後，暫時未有利淡消息，月中習拜會係好友反攻藉口，今日如能守穩10日線，17,200點水平企穩，收市能高於周二高位17,338點，有望扭轉過去多月弱勢，展開一個較大反彈浪。

相關文章：

港股開市｜美國不加息 恒指高開180點 新能源車企數據佳 小鵬股價漲逾5%最強

青島啤酒稱查明工人在車廂小便 已遭行政拘留 向消費者致歉

---
投選心目中把ESG實踐得最好的機構 贏主題樂園門券！ https://bit.ly/46TyJFM

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ