專欄｜豈能盡如人意 但求支持愛隊

剛剛過去星期一熱刺對車路士，藍戰士最終在11打9嘅情況下，憑着尼古拉斯積遜帽子戲法以4:1勝出倫敦打吡。賽後好多人探討緊熱刺嘅高位防線，而我更想探討一下球迷嘅心態。

事後球迷反應兩極，包括我在內都認為車路士表現相當之曳，有一種莫名嘅憤怒，理論上11打9應該係非常之輕鬆，一早可以鎖定勝局，但把握力欠奉，有大量必入機會嘅決定都好差。大量香港留言板、討論區一致認為車仔雖然贏波，但比賽發揮非常之差，領先2:1時更加要按爆平安鐘。

明白好多球迷都會不滿，心諗連對9人嘅熱刺都咁辛苦，應該要一早大炒對手，擔心對曼城會好大鑊，今季戰績都唔會好得去邊。不過，我睇到外國球迷嘅社交媒體，則大事慶祝，唱着球會會歌，讚頌着球員的表現。或許你可以話佢哋短視，其實車路士𠵱家嘅排名贏到榜首嘅熱刺，加上一場倫敦打吡，真係非常之困難，更何況每一場波都係重新計算，好多球迷都無諗過利物浦逼和盧頓啦。

每一場波都真係唔同，不停諗咁多，抱怨咁多，倒不如自己愛隊贏波時好好慶祝一下。Willhappy

-----

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ