獨家丨黎彼得經濟拮据靠自己唔搵巨星幫手 笑談陳年做節目秘史撮合學友羅美薇
2023-11-14 07:00 
73歲綠葉演員兼填詞人黎彼得（Peter哥）去年入院「通波仔」後停工，幸獲富商劉鑾雄主動資助手術費及每月生活費，加上契仔黃宗澤等人出手相助渡過難關。不過近月大劉已暫停生活費補助，Peter哥形容得返半杯水要慳住飲。雖然入行超過50年有唔少紅星朋友，但他強調：「有啲骨氣，咪旨意人哋會幫你！」他又大爆做電台節目的陳年秘史，及跟紅星的淵源，原來張學友同羅美薇結婚同佢有關。 採訪：方騫平 攝影：鄧國良
「鬼才填詞人」黎彼得是第一代清談節目主持人，80年代曾主持極受歡迎的商台夜間節目《豪情夜話》，唔少紅星會慕名而來傾心事，更成為宣傳聖地，因而跟大纜都扯唔埋的發哥、劉嘉玲及張學友等成為老友，他更自爆當年有好多女仔向他示好：「有啲𠵱家係紅星，仲係港姐嚟，哈！唔係點可以埋到我身，但我唔會攞人着數。」
張學友黃霑曾交惡
往事只能回味，Peter哥稱做電台節目有好多搞笑嘢，「黃子華上節目暢談扮死屍經歷；阿Sam就帶埋結他齊齊唱歌；發哥會叫大堆外賣，邊食嘢邊傾偈；有次黃百鳴做完午夜場宣傳，帶咗《開心少女組》袁潔瑩、羅美薇、陳加玲嚟直播室，咁啱張學友在場，佢同MayMay就初相識，當晚學友提出車埋MayMay返屋企，女方當年仲係𡃁妹仔，學友九成睇中佢啦，之後佢哋先一齊拍電影《痴心的我》。」Peter哥講到停唔到，稱多年後學友做音樂劇《雪狼湖》時，他跟MayMay仲多謝佢，「『兩隻嘢』喺後台攬實我話，冇我，佢哋唔會結到婚，我係佢哋哎吔媒人喎！（咁有冇畀媒人利是？）冇。 」又提到1984年學友獲得《十八區業餘歌唱大賽》冠軍，Peter哥任總評判，「佢唱得最好，我諗佢多少有啲感恩，所以我喺商台後期患急性肝炎，佢帶埋果籃獨自嚟探病。」Peter哥又爆因為廣告費問題，學友曾跟前輩黃霑鬧交，搞到兩人面左左，黃霑嬲到唔再用佢，最後由他幫手拆返掂。
同許冠傑不相往來
講到跟「三朵金花」劉嘉玲、吳君如、曾華倩的情義，Peter哥最深刻：「幾條友成日嚟我屋企，一傾就通宵，初入行嘅嘉玲唔識講廣東話，我教佢用錄音機錄起讀報紙，佢好感性，對我好好，不過，𠵱家絕對冇聯絡，佢哋有佢哋行嘅路點會搵我呢？人到咁上下自動會換一班朋友，好似黃子華咁都唔會搵我啦，人去茶涼唔會記得，人生就要睇開啲，正如我同許冠傑生死不相往來，真相永遠不便講。不過呢行真係有好多神話，當年我同成龍飲過咖啡傾車，佢叫我買法拉利，哈！當年我揸Ben跑㗎，但俱往矣唔使諗。」而他最欣賞黃宗澤有情有義。
啟發人生無求最好
Peter哥坦言目前冇工開，除有些少定期，流動資金唔多，但每月要為34歲獨子找卡數，連埋供佢內地讀中醫及自己嘅生活、醫藥費，最少開支5萬多元：「係徬徨嘅，自己唔食個仔都要食，鬼叫自己生個咁嘅仔都冇辦法，就算佢知我苦況都唔會睬你啦。」73年的人生經歷亦啟發他：「人無遠慮，必有近憂，思想不妨消極，但行動就要積極，原來人生冇災冇難冇拖冇欠冇兒冇女，無求係最好。」
Peter哥冇電影運，亦自知喺呢行甚麼都不是，94年離婚後賣樓決心轉行做生意，「荷葉凝珠，不及東風一浪」致投資失利。問到經濟拮据會否向紅星朋友求助？他即說嘥氣：「上山尋虎易，出門靠人難。識解冇？」還強調各有前因莫羡人：「求人不如求己，有啲骨氣，咪旨意人哋會幫你，依賴他人永遠冇用，廢物！」
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應