星8卦｜「打得」感激「公子」栽培討厭老公怕事膽小離婚再拼博

2023-11-17 11:00

因為離鄉別井打拼，「打得」好感激「公子」一直對自己好照顧，「公子」有個特殊癖好，特別鍾意一啲又乾又瘦嘅女人。「打得」同「公子」相遇正值人生低潮，所以成副營養不良咁嘅樣。「公子」見佢背景都有料到，讀過吓書身手唔錯，嗰幾年真係扔咗好多錢去「打得」身上，而佢又好爭氣，令到公司都有名有利，「公子」最威都係嗰幾年。

之後兩個人情投意合好快結埋婚，但「公子」一味想老婆生仔唔好再出名，「打得」仲覺得自己有排玩，呢一樣嘢始終共識唔到，仲要係「打得」性格比較強。好似有次交通意外，係鬧市鬼咁引人注目，「公子」怕事一直坐喺車上面唔肯出嚟講數，對方見你怕事梗係唔客氣，歪理當道理要佢哋賠大筆錢。

「打得」睇唔過眼，終於喺重要關頭落車同對方理論，而且句句都係道理，但一嘈就成條街啲人都望實晒，唔知「公子」做乜咁怕事，竟然落車自己行咗去完全唔理老婆死活。呢件事之後聽講「打得」無同「公子」傾咗成個月偈，久而久之睇到對方啲唔負責任嘅行為，主動喺一年後單方面離婚，從此各行各路，完全唔再聯繫。