古天后日誌｜人民幣匯價轉強 有利中港股市

11月21日，天晴，天氣乾燥，日間天氣較溫暖，日夜溫差較大。美國感恩節假期臨近，美股隔晚反覆向上，道指喺波音公司及微軟股價攀升帶動下高走，抽升超過200點，收市升203點。標指亦升33點，企穩於4500水平之上；納指喺NVIDIA股價創歷史新高刺激下，升超過1%，收市升159點。至於中概股表現勇猛，主要因人民幣匯價急升，兌美元離岸價升逾500個點子，重返7.15至7.16水平，反映中概股表現嘅金龍指數急升3.5%。

市場憧憬年底前中央再出招

美股業績期近尾聲，一直由科技股領跑，資金開始炒落後，零售股近日有資金抄底，市場對美股後市信心仍滿滿。NVIDIA跟微軟股價率先創新高，目前美股仍然係全球流動性最強股市，全球資金都投向美股懷抱，睇嚟到年底之前，美股都應向好，切忌估頂做淡。雖然美國喺6月至9月期間，通脹小幅反彈後，畀機會空軍出手做淡，但通脹只係小幅反彈後再度回落，未來數月CPI會向住3%方向走，美聯儲把口再鷹，實際上已再無加息借口。目前市場風向又轉，最新估算明年會減息1%，融資成本下降有利企業盈利向好，明年標指每股盈利增長10%至15%唔係問題，雖然美股一直被指估值過高，標指平均PE去到20位，但只要明年減息，企業融資成本下降，盈利重新展現活力，所謂過高估值，只會成為歷史，屆時標指破頂亦係正常。

至於港股喺人民幣大幅攀升下做好，噚日人民幣中間價開出7.1612，係今年8月11日後表現最強，有利中港股市表現。市場憧憬年底前中央再出招撐經濟，或會於下月舉行嘅中央政治局會議中，釋出「穩經濟」訊號。即使內地目前整體經濟仍未重拾活力，但相信最壞時間已過，再差落去嘅可能性有限，自然利好人仔匯價，加上年底人匯例牌回勇，都有利中港股市表現。

成交未能配合升勢

港股噚日反彈逾300點，重返50日線（17,619點），恒科指則重越4,000關，雖然噚日只有1063.65億元成交額，仍未見有資金大量湧入，但都叫keep到過千億元。隔晚夜期跟ADR升逾百點，高收於17,900點水平之上，預期今日可進一步挑戰18,000關，及上周高位18,174及100日線（18,251點），而噚日高位17,788點及17,800點為今日即市支持，盤中回調只要守住呢啲位，後市仍有機會繼續向上突破。古天后自上月期指結算後，一直睇好11月及12月港股表現，無奈中港股市本身市底較弱，加上未見外資重返，成交未能配合升勢，令好友想做好啲港股都似拉牛上樹。不過當人民幣匯價回勇，而阿爺又連番放水，對整體氣氛利好，只係高追意欲唔大，但當見回調，即有資金低吸，都已經較之前低處未算低已大有改善。

---
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ