古天后日誌｜港股反彈無力 缺水惹的禍

11月23日，天晴，日間乾燥及溫暖。美國今日感恩節假期，隔晚美股保持升勢，三大指數上升，道指升184點；標指及納指分別升48點及65點，最近七個交易日升咗六日，美股流動性可見一班。全球資金湧向買美股仍然係主流，美國感恩節假期，本周只餘下半日市交易，明天也是半天市，周末看Black Friday銷售，估計仍有單位數增長。

美匯回落至103.5，人仔升回7.16，但A股仍然彈唔趗，成交由1萬億又回落至8,700億水平，反映場內資金面仍薄弱。內地出現通縮，人人都莫財，唯有喺股市套現，令A股跌跌不休。港股仍受中美股市影響，美股升港股借勢挾淡倉，A股跌淡友反攻，上周持續保持喺大約1000億元成交額，但至噚日又回落至850億。期指回調走弱，股票買盤就走佬唔見人，資金只係跟風短炒，長線資金比例少得可憐。外資一去無回頭，主要係怕咗內地嘅政策風險無險可守，呢個問題一日唔解決，中港股市仍然只會係有波幅，冇升幅。

欠缺新資金入場

近一個星期港股表現呆滯，恒指17,400點至18,000點之間上落，噚日恒指幾乎平收於17,734點水平。比較理想係上周恒指升穿20日線（17,515點）一直企穩，走勢上未有轉壞。可指未見有新資金入場，好友有心無力，就係升唔起，動彈不得。加上噚日人民幣兌美元喺超買下回調，以及A股表現疲弱，限制港股反彈，幸而亦未見下跌。目前日線圖正營造三角形走勢，待20日線進一步上移，跟10日線（17,615點）及50日線（17,602點）匯合，三線匯聚爆邊突破。不過今晚美股休市，估計港股更為淡靜，繼續於17,600點水平爭持。預期港股隨ADR及黑期低開，維持喺17600水平牛皮，或有機會略為向下考驗20日線，預期今日大市於17,550點至17,800點之間上落，如A股有反彈則有助港股回升。

其實睇返客觀條件，10年美債息已見回落至4.4%水平，市場預期息口已見頂，加上人民幣大幅反彈，扭轉持續向下弱勢，貶值預期告一段落，加上習拜會後中美關係有所緩和，至少唔會繼續惡化，種種因素均利好後市發展。無奈嘅係欠缺新資金入場下，缺水不成，港股想升都升唔起，不過相信今年低位見咗，現水平再大幅下跌機會比較微。目前係等待三角形突破，再配合利好消息向上突破。其實港股喺萬七水平呢啲接近今年低位已整固咗兩個月，若能升穿100日線（18,210點）同時突破20周線（18,171點）或有望加速向上。回補於8月14日所遺下嘅裂口，即挑戰18,793點至19,050點水平。

---
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ