星8卦｜「肥婆」唔玩得臭品扮公主被扯甩假髮發癲得罪全世界

2023-11-28 11:30

「肥婆」臭品全行知，都唔明點解佢老公頂得順，可能佢對住老公又第二個樣。「肥婆」出道至今狀態都唔好，但因為有「輸哥」睇住，你話係咪有嘢又未必，但佢次次乜嘢大製作都將最好嘅角色留畀「肥婆」，久而久之佢以為自己真係好掂。其實呢，「肥婆」樣樣都好普通，銀色旅途行到今日咁嘅地步已經係好好彩。好多同佢出過門去做嘢嘅人都怕咗佢，因為「肥婆」唔知憑乜覺得自己係公主咁，乜都要人就住佢去，以佢為主。

有次遇到班睇佢唔順眼嘅「男一」，個個都賤賤格格㗎，你好咪好囉，你扮晒嘢咪一齊玩你囉。「肥婆」又係唔知死咁玩黑面要人照顧，「男一」其中嘅「巴閉」全個旅程窒到「肥婆」飛起，仲唔覺意咁整甩佢個假髮，等佢出醜人前。

「肥婆」癲咗咁大吵大鬧，由於收咗錢做嘢，主人家都好唔高興「肥婆」咁唔克制，最抵死之後佢唔再出現，搞到大家唔知點同畀錢嘅人交代。叫佢一齊去諗住幫吓「肥婆」嘅「大班」，終於睇清真面目，於是落閘斬纜，連佢都收手，「肥婆」真係處境堪虞，有排都無嘢做，但咁嘅性格無人緣自然無觀眾緣，提早收工都係時候。