獨家丨梁洛施鬧女戲被14歲大仔寸爆：同鬧仔一樣咁惡　《爆裂點》Cut晒感情戲張家輝呻失落

張家輝和梁洛施（Isabella）在電影《爆裂點》中首合作勁有火花，甚至投訴對手戲唔夠，更提議下次可合作拍攝有關精神病的電影，家輝表示，「因為我哋都黐黐哋。」戲中兩人都被反叛仔女搞到頭痛，同為父母的二人亦感同身受，Isabella更忍唔住自爆，囝囝寸佢戲中鬧女演出同現實鬧仔一樣咁惡。採訪：杜杜 攝影：譚志光 髮型:Evan Wong(家輝)、Nick Lam@orient4(Isabella) 化妝:Midco Chu(家輝)、AnnaEden (Isabella) 服裝:Christian Dior(Isabella)

兩人都認為今次合作戲份太少，希望再有合作機會。

兩人都認為今次合作戲份太少，希望再有合作機會。

家輝好耐冇拍港產動作片，所以都拍得好興奮。

家輝好耐冇拍港產動作片，所以都拍得好興奮。

全面復出的Isabella，最想拍動作片，可以由頭打到尾。

全面復出的Isabella，最想拍動作片，可以由頭打到尾。

Isabella第一次跟林超賢合作，事前做足準備，但仍然同預期有好大落差，「試造型時，Lam導話我太瘦，想我有啲肌肉，同埋曬黑，我用咗3個月曬黑同操肌，到最後原來啲衫係冬天衫，遮晒。」她又以為跟著「魔鬼導演」拍攝會好辛苦，最後原來唔算打太多，「我還可以。」過來人家輝即插位發言：「呢啲咪唔知埞，又話唔怕黑唔怕鬼，未真係入肉啫！」

兩人一講起林超賢，都表現得好興奮。

Isabella在開拍前狂操肌，為做打女作好準備。

家輝唱學友歌介紹角色

張家輝形容同林導合作「不嬲都入晒肉」，再合作亦份外興奮，「每次喺拍攝現場，睇到嗰種幹勁，嗰種火會開心，感覺拍緊一部好認真嘅戲，所以佢會導致Bella呢啲初次同佢合作，好雀躍，好緊張，緊張為林超賢衝鋒陷陣、視死如歸，我見佢（Isabella）、Shaun（譚俊彥）、陳偉霆，個個預咗為林超賢死，嗌佢跳海就跳海，插牆就插牆。」至於初次跟飾演卧底的陳偉霆合作，兄弟情亦令家輝好感動，仲講到要大唱張學友名曲來交代，「我個角色家庭好破裂，個人好空虛，阿Lam想塑造寂寞的男人，『繁忙的工作，加一把勁來過渡』（唱《寂寞的男人》）變成咁嘅背景，當拍住偉霆就將感情投放返喺佢度，當佢係細佬，好信任佢。」

家輝笑言對林超賢導演又愛又恨，每次合作都是新挑戰。

家輝跟陳偉霆首次合作，戲中的兄弟情相當感人。

有感而發教仔女唔容易

戲中家輝和Isabella分別飾演總督察和製毒師，均被反叛仔女搞到頭痛，由於兩人亦是父母，承認特別容易投入角色。2006年已跟太太關詠荷育有囡囡張童的家輝，面對17歲的囡囡特別明白角色處境，「自己都有後生時，都會想人包容，但嗰個年代冇咁好彩，打就已經係包容，哈哈！𠵱家我為人父母更加要包容，呢個年代唔可以講暴力𠻹啦！當我演時，飾演我個仔發生好多事，為人父母包容心態就演得真實啲。」Isabella點晒頭認同，身為3子之母，大仔李長治亦已14歲，她亦深明跟青春期子女的相處方式，「自己又係阿媽，好幫到我入角色，試片時，我有畀囝囝睇我鬧女嗰場戲，我個仔話『係呀！你就係咁鬧我㗎啦』哈哈！我平日都唔會點鬧，𠵱家佢哋teenage唔鬧得，要傾！」

家輝跟關詠荷育有囡囡張童，今年已17歲。

Isabella跟李澤楷所生的長子李長治，今年已14歲。

Isabella演繹的鬧女戲，被囝囝寸爆。

家輝鼓勵Isabella做打女

對於初次合作，家輝稱劇本曾令他好興奮，「初初阿Lam話有女拍檔，有感情發展，有啲微妙，點到即止咁，可能寫落去太緊湊，我個角色要面對太多嘢。」Isabella秒回應：「但面對唔到我囉！哈哈！」家輝透露聽到林導要cut這些戲時都好失落，「我心裹覺得『少少啫，你拍埋落去好唔好呀』，但冇辦法攝落去。」至於Isabella亦承認今次合作令她有點失望，「我同Lam導講唔夠喉，好開心同家輝哥合作，諗住有好多戲，點知佢太忙（個角色）啦，希望下次可以。」

家輝親身上陣演動作戲，跳橋一幕更搞到「拗柴」。

Isabella首次感受尖沙咀封街拍槍戰戲，氣氛特別好。

Isabella仲提議下次可以拍一套關於情緒病的戲，家輝即搞笑回應：「因為你都覺得我有啲精神病，所以好合適去做？啱啦呢個拍檔，我睇到佢都係黐黐哋，哈哈！」問到笑到傻咗的Isabella，全面復出後最想拍的角色？她即答動作片，「今次話係動作片，但我個角色文戲比較多，好想試動作。」問夠唔夠膽挑戰家輝戲中的動作戲，家輝即鼓勵她，「梗係要超越啦！」Isabella都同意，「都真係要超越。」

兩人戲中分別飾演警察及毒犯，註定要對立。

兩人在戲中有衝突戲，感情戲就欠奉。

《星島頭條》新網站有更多精彩內容：http://www.stheadline.com/