獨家丨七師傅被封「深水埗觀音」：賺到錢要幫人運程書大賣加碼派6位數物資贈市民

2023-12-15 08:00

玄學家七師傅(七仙羽)推出的2024年運程書《七仙羽教你龍年逢凶化吉》報捷，登上書店的「休閒趣味書藉暢銷榜」第1位，七師傅好開心，平日會交託義工，定期於深水埗基隆街派糧油蔬菜予基層市民，今次就親自上陣，更加碼派夠6位數物資。另外師傅又贈香港人幾句，叮囑大家明年唔好掂樓市及股市。採訪：方騫平

好有善心嘅七師傅笑住布施。

七師傅派6位數物資支援基層市民。

七仙羽拉埋妹頭、阿正做義工派資。

七師傅派足成粒鐘。

近日七師傅除咗宣傳運程書，更忙於跟主持盧頌恩（妹頭）、李尚正為下月15日起，逢周一至晚九時播出的HOY TV節目《開運秘笈2024》錄影。3人日前在深水埗拍外景，身穿紅噹噹旗袍嘅七師傅拉住途人傳授參花掛紅嘅開運秘笈，相當搞笑。

七師傅、主持人阿正為兩位途人加持開運。

師傅好搞笑。

期間七師傅親力親為大派糧油、蔬菜、水果、飯盒等一大堆物資，排隊人龍去到街尾，好有善心嘅七師傅企足成粒鐘，更獲叔叔狂影，大讚佢好靚女！師傅理智說：「我自己知自己事，唔會因為人哋讚兩句就加添咗信心，以前就真係靚，𠵱家工作太忙老咗好多。」師傅每周都於同一地點布施，被李尚正封做「深水埗觀音」及「基隆街菩薩」，師傅坦言香港經濟唔好，尤其基層市民叫苦連天，既然賺到錢應該幫吓人：「種善因得善果，我反而好少享樂。」

叔叔邊影邊讚七師傅靚。

七師傅和妹頭、阿正在深水埗拍HOY TV節目《開運秘笈2024》。

HOY TV節目《開運秘笈2024》下月15日起，逢周一至五晚九時播出，朱智賢係其中一集嘉賓。

明年唔好掂股市樓市

七師傅再叮囑大家明年要注意金融風暴，樓市及股市最好唔好掂。開設按摩及美容店嘅妹頭被七師傅形容入老闆形態，讚她會越做越好；而阿正的事業繼續平穩。另外，七師傅對於運程書成為各大書店「休閒趣味書藉暢銷榜」第一位相當感動，因為有好多大師跟她競爭，去年她只能排第3位，自言除咗神預測外，做乜都勤力過人，就連搞簽書會都特別多。