王雙駿首開作品音樂會 霆鋒撐場暗藏Eason有份

 

人稱Carl叔叔的王雙駿是行內有名的音樂人，92年正式開始唱片監製的工作，期間合作過的歌手不計其數，今年3月9日他將會於會展首開其作品展，是次音樂會以「Hats On」為題，全因Carl叔叔多年的「招牌」戴帽造型：「我好鍾意帽，儲咗差唔多廿年， 而當中有好多頂帽都係有好多唔同嘅故事同經歷。我覺得唔同剪裁、唔同設計、唔同物料嘅帽，各有形態，每頂帽都有佢自己嘅個性，同今代我邀請嘅歌手、樂手一樣，每位都有自己嘅特質同長處，作為監製嘅我，同樣會將每個人最好嘅獨特一面呈現出嚟。」

 

Carl叔叔戴上五頂帽子，每頂都代表將於音樂會上演出的歌手。

 

是次演出陣容，當中包括謝霆鋒、麥浚龍、柳應廷、李駿傑、吳林峰及& The Duo Band等，Carl叔叔指全是多年來合作無間的歌手，並稱:「我識霆鋒時佢得十九歲，係個好『刺激』嘅人，完全唔理世俗眼光，喺我哋嘅創作入面，聽眾會感受到好多熱血嘅火花，睇住謝霆鋒由年少輕狂，慢慢發展出一種穩重，成為一個好全面嘅藝人。而我識Juno嗰陣佢得十幾歲，咁多年嚟我哋傾偈嘅方式好特別，十句入面有八句都係『廢話』，但係呢啲默契會成為創作概念，我哋『鬥』天馬行空、『鬥』不著邊際，所以每首歌都會有唔同嘅驚喜。& The Duo Band嘅合作，唔止改變咗我嘅音樂生涯，甚至影響埋我成個人生，我學識咗，好多時唔需要諗太多，玩咗先，令自己開心就足夠，我同& The Duo Band有好多回憶，啟發我好深。」& The Duo Band成員當中其實暗藏Eason，難怪好多心水清的歌迷都覺得阿Eason好大機會都會出現支持。

 

王雙駿說每頂帽都有不同的音樂故事。

Jeremy是王雙駿其中一個最欣賞的新進歌手。

Juno跟王雙駿認識超過二十年。

 

至於新生代歌手，Carl叔叔說：「最初收到邀請幫Jeremy（李駿傑）造歌嗰陣係特別興奮嘅，好欣慰對方終於有呢個機會，因為香港樂壇好耐冇出現過呢種『質地』嘅藝人，佢好知道自己想要咩，對監製嚟講係一件好幸福嘅事，Jeremy係其中一個我比較偏心嘅合作單位。而JER（柳應廷）就好似航行大海嘅水手，只會向前，永遠見唔到佢向後行，佢唔會隨風而擺，好知道自己希望呈現嘅音樂係咩樣，同佢加埋小克創作嗰幾個系列，係我近年玩得最複雜但又最起勁嘅音樂企劃。」

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ