頭條戲場丨《大叔夢中人》盲從網民冇好下場

2024-01-11 07:00

電影探討的主題好有意思，就係對失控的網絡世界作出地獄式諷刺。人人都有智能電話，每日瞓醒即開始接收大量垃圾資訊，「阿媽係女人」式推播睇到滾，耳濡目染入晒腦，搞到發夢都夢到古怪影像。電影意念超癲，前半段非常好笑，以夢境開始又以夢境作結，開頭以為係科幻片，原來係奇幻社會倫理片。Nicolas Cage真係好適合演地獄黑仔王，最重要佢終於告別爛片，繼21年前《何必偏偏玩謝我》後，再獲提名音樂或喜劇金球影帝，雖然最終落敗，但都值得恭喜佢呀。(上映中) 撰文:廖思慧

Paul好可憐，由上神枱到跌落地獄都唔到自己控制。

A24作品一向行詭異及奇情路線，《大叔夢中人》亦一樣，導演Kristoffer Borgli聰明地以夢來包裝社會現象，可以好瘋癲及毫無邏輯但又好真實。大學生物教授Paul Matthews(Nicolas Cage飾)一向零存在感，兩個女唔理佢，老婆又嫌佢，滿腦大計但永遠得個講字，中年危機感極強。有一日呢位秃頭阿伯突然成為所有人的「夢中人」，大量人在網上宣稱在夢中見到佢，小鎮廢老的生活從此起了翻天覆地的變化。

囡囡本來唔理Paul，但老竇成名後主動搲合照。

Janet (Julianne Nicholson飾)係Paul嘅衰老婆，超自私勁憎佢。

慘被擺上枱
網民同球迷一樣不可理喻，今日捧得起你，第二日可以將你踩落地殼底，冇成本又唔使負責任。導演用「個個都夢到你」代表素人突然爆紅現象，玩到好癲，除大膽寸爆最鍾意造神的網民對無辜的人作出攻擊，兼點名憎恨網絡癌症「取消文化」，睇到大快人心。廢老Paul突然成為名人，開心接受訪問，又拍廣告，然後「夢中人」突變「夢中死神」，慘嘞。夢中的他並不是他，花生友熱捧及討厭亦唔係Paul真人，已得到好處的Paul慘被審判，罪名是莫須有。

Nicolas Cage將無能、鬱鬱不得志又滿口解釋的廢老演到入晒血，電影得意又古怪，雖然下半段有啲偏離，可以接受。從來都話盲從網民無好下場，遠離社交媒體可保平安。