星8卦｜「新貴」行運 「人妻」打當年情牌搞霧水緣 當「正印」無到

「新貴」行咗個中年運，好彩咁多年老婆為佢默默付出無白費。但人紅就多女埋身，何況「新貴」都叫做青靚白淨，有個同期嘅「人妻」特別鍾意任何時候都企埋一齊。
「人妻」其實都有幸福家庭，老公唔夠阿妹嗰位咁巴閉，但都唔使做有錢使，仲由得你出嚟追求夢想。

佢同「新貴」識於微時，當年已經眉來眼去，未至於拍拖，但互有好感係肯定，可惜「新貴」搵朝唔得晚，「人妻」都係現實嘅，所以唔敢再進一步。「新貴」又死唔去，遇到又係比賽出身嘅「正印」，知道佢困難，連屋企嘅積蓄都攞咗一半嚟幫佢過渡，所以「新貴」對佢係好感激。

捱窮唔緊要，而家「新貴」開始搵到啲錢，紅咗就連樣都順眼，「人妻」竟然利用番當年情，對「新貴」施展媚功，初時男嘅唔多有戒心，諗住你有老公細路，一定會檢點啲。但第三者睇睇吓唔多對路，就提「新貴」要提防，今日開始好運，就唔好俾啲邪花影響。

結果連「正印」都收到風，而家跟出跟入，喺「新貴」身邊畀人知佢已經有老婆。「人妻」依然唔死心，日日用兄妹名義繼續跟喺佢哋身後，所以「正印」近來成日黑晒面，睇怕都係同呢位第三者有關。

 

相關文章：

星8卦｜「珠女」復出反應麻麻見盡人情世故 靠「魚佬」密密做養家

星8卦｜「乖仔」「哥哥」兄弟情斷　紅顏禍水搬弄是非玩離間

星8卦｜「歌后」欲擒先縱氹掂「二代」 棄「花旦」娶自己高招

《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF

想睇更多精彩內容，請立即瀏覽「區區有申訴」活動專頁，https://bit.ly/41hgS9E

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ