頭條戲場丨《墮下的對證》結婚誓詞真係廢話

《墮下的對證》 繼獲得康城金棕櫚獎後，再奪金球獎最佳劇本及最佳外語片，劇本舖排超勁，層層遞進，你以為懸疑片，其實是一套剖析婚姻的倫理片，實至名歸。因為老公墮樓，老婆成最大嫌疑人，後者需要在法庭提出証據證明自己清白，死老公都冇時間療傷就要將私密家事放上法庭作審判。一場死亡牽引出呢兩公婆爛溶溶的婚姻關係，互相傷害去到完全返唔到轉頭，最慘11歲視障兒子是唯一目擊證人，聽審後得知父母關係如仇人，母子感情亦被破壞，睇到心寒。(上映中) 撰文:廖思慧

作家夫婦本來好好，因為Samuel的唔小心令兒子有視障，關係開始有裂痕。

兩公婆都好有型，因為一個決定抱撼終生。

一開場的超大音樂聲已令人非常不安，然後命案發生。死者是法籍作家Samuel(Samuel Theis飾)，他跟亦是作家，但較他受歡迎萬倍的德籍老婆Sandra(Sandra Hüller飾)，11歲兒子 Daniel(Milo Machado Graner飾)及愛犬snoop(Messi飾)隱居法國阿爾卑斯山區的偏遠小鎮。一家三口原本定居倫敦，因為經濟問題搬到好遠，女主外，男主內，男主人鬱鬱不得志，女主人越飛越高，埋下可摧毀家庭的炸彈。

Samuel墮樓，老婆因為喺屋企而百辭莫辯。

人類好奇怪，好鍾意用惡毒嘅說話鬧最親嘅人，萬劫不復呀。

Samuel因為嫉妒當老婆係仇人。

比離婚更慘的事
電影絕非老婆被控殺夫，最終沉冤得雪式老土故事，片長150分鐘，結局都冇交代究竟Samuel是自殺定被殺，因為已經唔重要，法籍女導演Justine Triet只想創作一部「描繪一對夫婦關係崩壞的電影」，恭喜導演，因為佢成功透過一單墮樓案去審視戲中夫婦已支離破碎的婚姻關係，案件的人証物証拼湊出夫婦的病態相處方式及永遠無法解決的難題，因為Sandra表現冷靜，一直對佢心存懷疑，至兩公婆鬧交錄音被公開，沒有婚姻經得起抽絲剝繭，成件事尷尬到不得了，結婚誓詞真係廢話嚟。

Sandra庭上表現好好，有理有據，明白點解佢嘅作品會受歡迎過佢老公。

「金棕櫚狗狗獎」是專門表揚在電影裏表現優異的狗演員，恭喜Messi。

成套戲最慘係個仔，爸爸死咗，媽媽被懷疑，再發現父母原來唔妥對方好耐。

主控官將Sandra塑造成不可信的疑兇，又以對方的作品嚟攻擊佢。

狗狗真係勁好戲，有幕睇到好驚，驚佢死。

Sandra同靚仔律師曖暖昧昧。

Daniel最後的證供非常感人，佢想維護阿媽虛構事件定真有其事?唔重要了。

劇本超勁，最記得戲中一句對白，Sandra的罪名就是在她老公失敗的領域中獲得成功。 完全是教學級叙事教材，究竟一段婚姻收埋幾多隱瞞、傷痛同嫉妒?連場法庭戲篤爆婚姻最真實的陰暗面，那段史上最到肉的夫婦鬧交戲絕對是未婚人士的震撼教育，毛骨悚然又唏噓，一套非常殘忍的電影。
 

 

《星島頭條》新網站有更多精彩內容：http://www.stheadline.com/