獨家丨馬貫東奪「男飛躍」自爆仍靠阿媽接濟入行18年歷盡辛酸曾被掟劇本

2024-01-25 07:00

曾被人掟劇本侮辱，37歲的馬貫東（Mark）終於吐氣揚眉，開齋首奪TVB台慶頒獎禮「男飛躍」獎。Mark 捱足18年，10年前曾被誤會是電視台道具工，自爆今時今日母親仍然久不久塞錢畀佢，即仍要靠屋企財政支援。得獎要特別多謝「救命恩人」楊茜堯，也希望令長期擔憂他的媽媽增加安全感。採訪：方騫平攝影：朱偉彥

37歲的馬貫東自30歲後，才突然醒覺人生步伐墮後。

Mark希望獎項可以令媽媽有安全感。

在單親家庭成長嘅Mark，是朋友眼中的「裙腳仔」。

Mark終極目標係「最佳男主角」。

馬貫東認為做人目標要高，但抱住平常心。

馬貫東嘅劇作《新聞女王》、《妳不是她》、《旁觀者》於頒獎禮前夕陸續推出，令他佔盡優勢，撼贏眼中頭號競敵阮浩棕、孔德賢成為最資深「男飛躍」得主。他自言要一步一步打好根基，希望3年內成為「男配」；終極目標係「最佳男主角」：「錢家樂話過『望住4座位座駕永遠揸唔到法拉利』，所以做人目標要高，但抱住平常心。」

Mark台上致詞時坦言「無畀家用」。

Mark早已睇好林子善係男配得主。

在《新聞女王》中有發揮。

《旁觀者》中飾演深水埗蝦蝦霸霸嘅小陀地。

憑單眼皮殺出血路

Mark入行18年，直至8年前的《鐵馬戰車》才有機會學習基本功；至於拍《愛·回家之八時入席》從毛舜筠及黎耀祥身上獲益良多；而《那些我愛過的人》演患有亞氏保加症醫生，第一次感受到演員嘅使命感，原來有責任帶出正確資訊畀觀眾，亞氏保加症病者唔係低智商；去到《破毒強人》的「杜飛」係另一個層面，從未接觸過有故事嘅大反派：「原來監製Marco睇中我單眼皮，同埋唔係好出聲呢個特質，最啱做意想不到嘅殺手，哈！第一次覺得原來單眼皮對演出係有幫助。」

《破毒強人》嘅冷面殺手「杜飛」令Mark事業起飛。

2016年拍《愛·回家之八時入席》跟周嘉洛Friend咗，亦從黎耀祥身上學咗好多。

8年前拍攝《鐵馬戰車》終有學習機會。

《那些我愛過的人》演患有亞氏保加症醫生。

《愛上我的衰神》受注目。

《點解阿sir係阿sir》做閒角。

跟謝芷倫在《愛·回家之開心速遞》係受歡迎一對。

楊茜堯借劇本解圍

Mark唔認為自己的事業是遲來的春天，反而覺得時間啱啱好，機會太早反而未必懂得珍惜，還爆出初入行時被楊茜堯「營救」經歷：「年輕時都係行行企企(做茄喱啡)，嫌個角色冇乜發揮，有次冇睇劇本返工，排位時先知原來係有句對白，要交代啲重要嘢，當時殺我一個措手不及，好彩身邊嘅楊怡(楊茜堯)隊份劇本過嚟幫我解圍，事後都知衰馬上道歉，自此變得專業，唔敢唔睇劇本。不過，阿怡嘅窩心舉動好深刻，最近再合作拍《黑色月光》舊事重提，但佢都冇乜印象。」

最近跟「救命恩人」楊茜堯拍《黑色月光》。

第21屆藝訓班學員，除他(第2行左1)外，還有張頴康(後左4)、陳志健(前左1)及阮兒(後左3)。

被掟劇本若無其事

提到辛酸史，曾被演員掟劇本的Mark冇放上心：「事後諗返自己都冇做錯，當時未開機，拎住劇本好正常，只係佢唔鍾意…(演員係咪燥底？)唔評論，事發時場內個個都呆晒，我同其他人當作若無其事，即使𠵱家見到面大家扮唔記得，仲有偈傾。」他唔嬲還自我安慰：「算啦…只係反映佢嘅人格，唔會影響到我，可能佢嗰期唔開心呢！呢個係入行以嚟最愕然嘅經歷，一個人喺公司18年，冇可能係一帆風順嘅。」

同視帝陳豪互相恭賀。

Mark認為入行頭10年「什麼也不是」的階段最艱辛，較半紅不黑嘅奀星還要奀：「記得有次睇醫生，醫院有病人搲水吹問我做乜職業？我答做電視台，對方追問係咪做道具工？我唔想多講就答係。雖然𠵱家多人認識咗，行街會有觀眾眼望望叫我『博士』、『杜飛』，但媽媽Keep住好擔心我將來，成日問『點呀？夠唔夠錢使？會唔會好辛苦？』佢每次返港，甚至會收埋啲錢喺衣櫃暗角stand by，久不久提示我唔夠就去『安全倉』拎錢。」Mark希望獎項可以令媽媽有安全感：「最開心見到媽媽開心，佢睇到網民留言話得獎實至名歸，會比我更開心。」在單親家庭成長嘅Mark，是朋友眼中的「裙腳仔」，他冇否認還笑說：「咁都ok嘅，至少冇行差踏錯。」