頭條戲場丨《一球翻身》笑料供應量充足

2024-01-26 06:30

電影改編真人真事，2001年世界盃外圍賽，美屬薩摩亞足球隊被澳洲隊喪炒31比0，成為足球史上最大笑話，自此球隊長期在FIFA世界排名中包尾。2011年，世人眼中的垃圾球隊竟奇蹟爆大冷踢贏對東加的賽事，全世界齊跌眼鏡，何其壯觀。拍過《雷神奇俠3：諸神黃昏》及《雷神奇俠4：愛與雷霆》的導演Taika Waititi對題材好有興趣，即搵嚟型棍Michael Fassbender做燥底教練，執教一隊如《少林足球》式的屎波雜牌軍。美屬薩摩亞靚景加數唔到咁多笑位，又Warm又Chill，真心好睇喎，爛番茄指數低成咁無嘢呀嘛?(上映中) 撰文:廖思慧

「廢Sir」於美國任教經驗豐富，因為連續幾季失手，被炒再放逐到美屬薩摩亞。

新官上任的「廢Sir」視球員為垃圾，逐個鞭屍，隊員詐晒型。

Jaiyah（Kaimana 飾）是史上第一位跨性別足球員，熱血又好波，但「廢Sir」唔識欣賞。

導演Taika Waititi有份旁白。

故仔好簡單，被全球甚至自己人都睇死的球隊冇放棄自己，為經營呢隊屎波之霸，當地足總負責人及球員都要打幾份工，但踢極都冇起色，興趣班式練波點會有運行?足總阿叔非常心灰，決定重金招聘新教練，明知山有屎當然冇教練願意應徵，然後，有位教開勁隊的失意教練「廢Sir」Thomas Rongen(Michael Fassbender飾)被放逐到當地入職，由落機一刻已對所有嘢睇唔過眼，又灰又火滾又好笑又打又鬧的勵志故事就此展開。

「廢Sir」經常笑Jaiyah，最後因了解而化敵為友，「索女」更成為隊中的精神領袖。

有心足總Tavita(Oscar Kightley飾）同個仔，後者都係球員，好憎「廢Sir」。

令自己快樂做人先有意義
電影絕對是導演Taika Waititi回魂之作，美屬薩摩亞球隊比賽前的「戰舞」文化，加阿豬阿狗都去踢波，玩搞笑的球技相當過癮，一貫導演的幽默低能搞笑風格，笑點夠生活化，對白非常好笑，程度係會令你不斷笑出聲，睇戲當日有大量麻用佬笑到豬叫咁，真心好睇過《雷神4》一億倍。