獨家丨彭皓鋒暴跌44磅仍樂觀:冇嘢捱唔過 醫直腸癌耗盡積蓄借6位數保命

53歲前TVB「惡人」彭皓鋒（歌手彭家麗胞弟），去年7月證實患上直腸癌第2至3期，好大機會要切除肛門，終生孭住造口袋，工作量不多又一向只做綠葉的他坦言為醫病已耗盡積蓄，更要向胞姐及女家親人借6位數應急，短期內再要籌30萬手術費，他堅持要正能量：「冇晒錢又如何？好返咪搵過，冇嘢捱唔過，最緊要開心。」他更鼓勵同路人，「要樂觀面對，一定有得搞。」採訪：方騫平 場地：台北.寬巷子@海港城

罹患直腸癌嘅彭皓鋒雖然病情嚴重，但都笑住面對。

彭皓鋒為醫病已耗盡積蓄。

彭皓鋒慶幸患病唔算辛苦。

彭皓鋒堅持要正能量。

彭皓鋒短期內再要籌30萬手術費。

去年彭皓鋒在慈善演唱會中，自爆患上直腸癌。

 

訪問期間不停飲好苦嘅中藥來增強免疫力。

患病期間注意飲食。

去年4月，彭皓鋒開始肚屙及感覺屙唔清，不停想去「開大」而去睇醫生，但疫情下延誤到7月才照到腸鏡，即發現直腸有個5cm大嘅腫瘤，而且位置好接近肛門，因為情況算幾嚴重，好多醫生都勸他趁擴散前盡快做手術，切除肛門保命。

中藥偏方多管齊下

目前彭皓鋒未有治療定案，坦承接受唔到終生孭住造口袋，嚴重影響日後嘅演藝工作：「𠵱家幾管齊下，先畀個多月時間觀察，試中藥、保健品及偏方治療提高免疫力，希望將腫瘤變細，同肛門有段距離就唔使切走埋個肛門要『封肛』，不過，呢個複雜嘅大手術要交畀有經驗嘅醫生處理，私家醫生手術費動輒30萬，未計手術前先做化療配合，但為咗節省支出，化療可能轉去公立醫院做，反正喺公院做效果都唔差。」另外，他已戒糖、貝殼類及紅肉，揀食有機菜、雞肉及魚肉：「有機食材好昂貴，而且選擇唔多，加上冇糖少鹽少油，食緊食材原味，一時間唔習慣冇乜胃口，體重急跌44磅，血壓都變低，老婆怕我會暈低，就算𠵱家內地有戲開都唔畀我去拍。」

只買住院保冇危疾

彭皓鋒要全面停工休息直至手術後半年康復為止，所以呢段時間零收入，仲要應付屋租、生活上及3子女開支，壓力好大，要向親人借6位數度難關：「因為我只買住院保冇買到危疾保，保額有限，𠵱家啲保健品樣樣都貴…但唔緊要啦，6位數唔係好多啫，咪好返努力搵錢搞欠債囉，冇嘢係搞唔掂，2012年時離開TVB轉投HKTV，HKTV唔玩前，我係第一批HKTV藝人俾人踼走嘅，當年前無去路，同老婆帶住兩個年紀好細嘅小朋友(當年得一子一女)咪又係捱過咗，老婆都係打工仔，唔係家境富裕。佢成日提我要有吸引力法則，諗『一定OK就掂。』既然控制唔到，無謂諗啲負面嘢，解決唔到就放埋一邊。正如𠵱家冇得食甜嘢，啲中藥好苦，又有啲原味嘢唔好食，我會同自己講『都有嘢啱食呀！個女生日可以偷食到一啖蛋糕經已好開心啦。』𠵱家只係換個口味啫，大把人慘過自己，我咁嚴重但冇病徵，唔覺有痛經已好彩，仲獲身邊朋友關顧，好似黑妹姐及肥媽咁，成功幫我傾到偏方治療嘅贊助商時，開心到攬住喊，比我更加激動。」

休養中嘅彭皓鋒仍要照顧一家人嘅生活費。

彭皓鋒為免老婆太擔心，不停展示歡樂一面。

彭皓鋒坦言有向家姐彭家麗經濟支援。

彭皓鋒當年做過彭家麗助手，眼見家姐易賺錢而選擇入行。

2017年憑《破冰》奪得《加拿大金楓葉國際電影節》網路電影組別「最佳男主角」。

想當年彭皓鋒(左1)曾跟少年謝霆鋒做對手戲。

《黑金風暴》做反1，演得相當出色。

被HKTV踼走後，彭皓鋒在內地拍劇4年，2018年劉家豪「執」他重返TVB演《解決師》。

彭皓鋒做「御用惡人」前都做過好人角色，2014年在內地劇《衛子夫》中演正直嘅易寒。

《逆天奇案》。

拍《戰毒》。

爭取和家人相聚時間。

同陳展鵬係老友。

問到患病後難忘事?他稱是見醫生聽報告時，嚇到老婆淚崩，「我反而安撫佢『咪當傷風感冒嚟醫，冇乜咁大件事喎！』」他叮囑病友：「要樂觀面對，一定有得搞，條命長短控制唔到，但可以控制到開心，令到身邊人開心，自己自然就會開心。」另外，彭皓鋒從冇埋怨多年來只做陪襯緣葉王：「坦白係人都想做主角，但要講天時地利人和，老闆都係生意人，就算戲好，邊個敢投資開戲畀我做主角先？佢哋都會計算嘛。做人最緊要開心，Enjoy過程咪得囉，只要有觀眾睇我啲戲，都會盡力演出。」

--------------------------------------------

《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF

想睇更多精彩內容，請立即瀏覽「區區有申訴」活動專頁，https://bit.ly/41hgS9E

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ