A股暴力反彈 帶動港股續升｜古天后

2月7日，多雲，有幾陣雨，今晚氣溫急降，明日天氣顯著轉冷。美國債息連升兩日後回吐，美國10年期債息反覆向下，曾跌8.5個基點，至4.082厘；息口敏感嘅2年期債息一度跌8.9個基點，報4.383厘。美股隔晚好淡爭持，道指反彈逾100點，收市升141點；標指倒升11點；納指一度跌0.5%，收市倒升11點。反映中國概念股表現嘅金龍指數急升近6%。

市場已消化聯儲局唔會太早減息，摩根大通首席環球市場策略員Marko Kolanovic認為，全球央行最快下半年先會開始減息，而且喺經濟未受到重大衝擊下，今年央行放鬆政策的力度料較市場預期溫和。德銀係首批警告美國經濟將陷入衰退嘅大行之一，經過兩年後，該行終放棄呢個預期。既然美國經濟軟著陸，甚至維持強勢，聯儲局亦唔需要太過寬鬆貨幣政策。

 近期美股除了咗AI板塊較強外，部份強勢股唔少都高開低走，或是低開向下走，願意再高追資金明顯減少。不過如Google績後消化完兩日沽盤後，已開始重返145美元績後首天高位，反映資金雖唔願高追，但回落至低位願意買貨。另一個例子係蘋果公司，業績達標但無驚喜，股價回試179美元後，已迅速反彈至190美元，隨著Vision Pro開始發貨有更多體驗報告，市場更期待中國5月開售會否有驚喜。不過Vsion Pro短期對整體業績幫助不大，只係炒作借口，高達30倍市盈率仍困擾股價。

美股重磅科技股業績告一段落，輪到港股中嘅ATMJ步入業績期，打頭陣有今日收市後嘅阿里（9988），績前股價連彈兩日，業績未知係咪有料到，早前阿里焦點人物如馬雲及蔡崇信紛紛增持股份。

周一阿爺降準0.25%，釋放萬億銀行新資金，加上連日不停發放好消息，中證監於周一四度發聲明撐市後，中央匯金噚日宣布擴大交易所買賣基金(ETF)增持範圍，國家隊繼去年10月後，再度真金白銀入市支撐，刺激A股暴力反彈。噚日再有傳聞內地基金不停向沽空機構融券，以助長空軍靠沽空搵錢，當晚阿爺約談券商了解情況，並提出暫停新增融券規模，明顯係要收緊借貨沽空，向沽空機構施加壓力，並迫令其補空倉。中證監又提到將全力維護市場穩定運行，擬繼續協調引導公募基金、私募基金、證券公司、社保基金、保險機構、年金基金等各類機構投資者更積極入市，鼓勵及支持上市公司加大回購增持力度，為A股市場引入更多資金。上證指數噚日升3.2%收2789點，若然今日升勢持續，有助港股進一步攀升。

A股強彈並帶動恒指噚日勁升626點，係去年7月25日以來首度升超過4%，重上萬六關，收報16,136點。夜期昨噚再升過百點，見16,310點，收16,274點，升94點。港股ADR比例指數升142點，黑期亦升抵16,300點水平。預期今日恒指高開，盤中若回吐守萬六關，有望挑戰50日線約16,300點關口，突破再試16,500關，即日線BB頂。即市阻力為16,300點至16,350點，即市支持為15,950點至16,050點。

古天后日誌

---
《星島申訴王》將推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF

想睇更多精彩內容，請立即瀏覽「區區有申訴」活動專頁：https://bit.ly/41hgS9E

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ