謝東閔想低調同朱智賢結婚 首次擔正最怕搞到甩頭髮 丨獨家

謝東閔在賀歲檔劇集《本尊就位》，首次擔正做主角，終於做好人角色的他，最初反而擔心甩頭髮。講到他年前跟吳業坤等朋友合資7位數開音樂中心，但因香港經濟未恢復而未敢開分校。情人節難得放閃的他，亦有計劃跟朱智賢結婚，但怕高調的他，未諗好點搞。 採訪：杜杜 攝影：譚志光 髮型:Jay@hola

東閔講到拍古裝甩頭髮問題，相當肉緊。

今年新年願望，東閔最想財源廣進。

近年經常演反派角色的東閔，在《本尊》終做好人，還首次演神仙「呂洞賓」，不過最初他都有擔心，「我好衰，第1時間諗演『呂洞賓』咪好大鑊，要成日黐頭套，因之前拍古裝，試過甩咗一忽頭髮，今次仲要係夏天拍幾個月，驚又冇咗忽頭髮，好彩後尾我睇咗劇本唔係好多古裝戲，不過都開心可以做神仙。」對於這劇後能否維持主角位置？他則看得好開，「當然想做主角，試咗呢套睇吓觀眾反應，公司自然會畀機會，做好咗自己先。」

東閔在《本尊就位》中飾演神仙「呂洞賓」。

劇中東閔大部份時間都是民初扮相，不用戴頭套。

後悔細個唔肯學琴

藝人工作太被動，加上一直有個音樂夢，所以東閔年前跟吳業坤等幾個好友，合資開音樂中心，「希望幫到啲對唱歌有興趣嘅人，亦令到小朋友可以從小接觸音樂，學多啲音樂技巧。」原來他小時候因不聽媽咪話學鋼琴，一直令他好後悔，「10幾歲鍾意音樂先至學返，嗰時都仲係懶，時間放晒唱歌度，冇專心學好樂器，依家喺學校處理公事之餘，有時間就練吓琴。」本來他希望今年再開分校，但計劃趕不上變化，「本來諗住疫情後經濟會好，點知仲差咗，所以都係睇定啲先。」

 

東閔跟吳業坤等朋友齊合資開音樂中心。

早前音樂中心搞活動，東閔當然要撐場。

情人節東閔難得貼出跟女友朱智賢合照，明年踏入4字頭的他坦認兩人有商量過結婚，「唔會距離好長時間，但係想低調啲。」他認為結婚相一定要影，但其他儀式可能需要再考慮，最搞笑他提起時個樣有點怯，「我好怕多人，好似有啲社恐咁，可能旅行結婚啱我啲，最好得兩個人咁結婚，但通常女仔唔鍾意，所以再諗吓先啦！」

 

東閔已開始跟朱智賢計劃結婚，但希望低調完成。

情人節東閔貼出跟朱智賢合照，難得放閃。

《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF

想睇更多精彩內容，請立即瀏覽「區區有申訴」活動專頁，https://bit.ly/41hgS9E

 

《星島頭條》新網站有更多精彩內容：http://www.stheadline.com/