38歲細細粒半年甩121磅公開自創必瘦減肥法曾急性糖尿病入院唔想早死過阿媽丨獨家

2024-02-27 07:00

38歲「細細粒」陳嘉佳近年在內地吃播界吃出名堂，每月平均做12次，每次直播都瘋狂喪食，相當唔健康，體重高峰時更達260斤(286磅)。去年細細粒突然宣布「時辰到」要減肥，佢講得出做得到，用半年時間極速搣甩121磅，目前得返165磅。據知，細細粒年前曾因急性糖尿病暈眩入院，為保命決心減肥，她自爆：「出事時糖尿23度，就算打咗胰島素只能降到15度，咁落去驚捱唔過50歲，我唔想早死過媽媽。」減肥超過50次的細細粒，更公開自家必瘦減肥法，各位瘦身同路人要留意。採訪：方騫平攝影：鄧國良場地：數碼港鍾菜館

得返165磅嘅細細粒好開心，因為終於可以翹腳坐。

側身有線條。

背面判若兩人。

正面變得修長。

細細粒用super green做其中一餐代餐，羽衣甘藍青汁成份有乳酸菌、益生菌及混合種子。

平台期令細細粒皮膚收緊，再加上緊身內衣減少鬆弛。

着緊身內衣拉緊拜拜肉。

減肥後的細細粒巨肚消失，重現鎖骨線條，最自豪成世女都未試過可以翹腳坐，𠵱家竟然做得到，最開心一粒西藥都唔使食，3高由爆晒標回落返正常指數：「𠵱家可以着到中碼衫及褲，不過，睇BMI指數係25，應該仲有減肥空間，希望5月39歲生日時，可以減到終極目標130磅。」

細細粒體重高峰時有286磅。

當日細細粒曾忽視健康問題。

當日體重驚人。

3高超晒標入院好驚嚇

細細粒好鍾意食，以前暴飲暴食鯨吞都唔識得飽，也忽視健康問題，直至年前如常地狂吃高糖份嘅日本生果，引致急性糖尿病：「出事時頭暈、好攰、口喝，糖尿指數升到23度，糖分致細菌滋生令下體痕癢，住院幾天就算打胰島素都降唔到血糖，指數維持15度，3高、三酸甘油酯等全部見紅超晒標，好嚇人，嗰刻我警覺到暴食帶來太差嘅健康，咁落去驚捱唔過50歲，(因為係獨女)唔想早死過媽媽，既然時辰到，係時候要食得清淡。加上去年王祖藍知我健康唔好，逼我入減肥營，雖然最後磅數都係打回原形，但學到有關減肥概念及正確知識，之後再去深入研究，點樣可以再健康啲。」

去年6月細細粒被網民發現面容憔悴現身浙江路邊攤，健康狀況惹人擔心。

王祖藍脅逼細細粒入減肥營。

在減肥營食菜。

營內做輕量運動。

但最後磅數都係打回原形。

3年多前細細粒曾秘密入院，當時只解釋係body check。

由於爸爸已離世，獨女細細粒最錫媽媽。

母女相依為命。

減肥50次令內分泌失調

講到減肥血淚史，原來細細粒爸爸有家族性遺傳肥胖，父系親人個個體重超過200磅，減肥對佢嚟講絕對唔容易：「由16歲開始被同學欺凌，笑我係肥婆，用過唔同嘅方法減肥，幾十年來減肥超過50次，咩方法都試過，甚至減到內分泌失調，真係冇諗過今次會咁有耐力，唯一死都唔肯做運動。」總結減肥心得，她認為除控制唔到生命，冇嘢做唔到，在乎個人決心，她唔主張唔食嘢減肥，認為方法非常陰功亦唔會成功：「只要愛上健康就唔會有被逼嘅感覺，要學識點樣食嘢可以Keep到健康，一世唔會反彈。減肥係要用飲食改變體重；用時間改變身體狀態；𠵱家健康經已回復正常，月事準到不得了，所以都想做減肥達人，第日有錢開間減肥中心幫人，內有營養及運動顧問。」

細細粒𠵱家體重返回11歲時磅數，但當年身高只得165cm。

13歲體形。

以前做鯨吞式做直播。

因為本身為食。

而且出來效果不錯。

往往食幾人份量。

食得開心。

狂食大閘蟹。

冇厭食胃口細好易食飽

細細粒想做減肥達人，更公開自創的減肥方法：「頭3個月要戒糖，每日飲夠2500毫升水嚟排毒；最少睡眠7小時，早餐可以飲齋啡及無糖乳酪、豆漿，食嘢更加按住守則去食，即係50%係菜；40%係蛋白質、得10%係碳水化合物，不能吃勾芡食物，還可配合飲有機蘋果醋；之後到平台期，我就由每日3餐變兩餐，想食乜都得，如食去皮炸雞上髀，甚至走一塊包皮嘅炭燒雞包，但瘦咗咁多唔會再捨得食肥自己；第2階段以深海魚及海鮮為主，第3階段其中一餐以super green做代餐，羽衣甘藍汁成份有乳酸菌、益生菌、再加入亞麻籽、奇亞籽等混合種子，既飽肚又有益。𠵱家我食嘢好隨心，肚餓就食啲肉，都會食兩塊煎蘿蔔糕，絕對冇厭食症及扣喉，只係胃口縮細咗，食好少已好易飽。」細細粒會繼續帶貨，但選品執着，唔會有反式脂肪產品，亦不用狂食：「其實狂食係因為自己鍾意食，而且出嚟效果唔錯，唔係商家要求。」