吳啟洋要努力搣甩Sica白痴樣：咁至入到戲 業主胡卓希教你如何快速儲錢丨獨家

Phoebus（吳啟洋）@P1X3L、Sica（何洛瑤）及胡卓希（Jason）在ViuTV劇《飛黃騰達》飾演投資比賽參賽者，前兩者表示對投資一竅不通，男方更後悔讀書時冇學好投資知識。另外，34歲好識投資的Jason首度跟Phoebus和Sica合作，大呻難融入年輕人氛圍，還搞笑投訴Sica唔尊重老人家。採訪：杜杜 服裝:@Sandroparis(Phoebus)、 b+ab(Sica)

Phoebus、Sica和Jason首次合作，溝通方式全靠互窒。

Phoebus在劇中首演乞人憎富二代「Alfred」，他嫌自己演得未夠放，「睇返可以再乞人憎啲，未夠想打自己。」Sica飾演「Yanny」跟梁文賢（Godric）的「Xavier」是孖公仔，「我哋拍劇先識，花好多時間溝通點演，去到後期真係變咗好朋友，一個眼神就有默契。」Jason跟角色「Stone」有好多相似地方，「我哋一樣供緊樓，投資都係只信數據唔信人，容易投入。」

Phoebus演寸爆富二代，他嫌演得未夠乞人憎。

劇中的Sica跟《造星II》的Godric是孖公仔。

Jason自封「儲錢專家」

劇中3人都擅於投資，不過Phoebus和Sica本身對投資一竅不通，前者更後悔冇修讀有關科目，「我中學冇修經濟，大學又唔讀BBA去讀工程。」Sica就笑指完全冇信心投資，「我唔夠膽攞自己錢玩，就算有技術可言，我個人比較黑仔會輸咗一半喺運氣。」自封「儲錢專家」的Jason對投資有認識，更分享首次置業經驗，「我會逼自己，如想買部1萬蚊相機，會儲夠10倍錢先，但儲到10萬蚊，就唔會想要1萬蚊嘅嘢，咁咪要再儲，5、6年前我儲到筆錢，唔想亂使咪同人夾份買樓，𠵱家租咗畀人幫手供。」

好識投資的Jason，除了有樓，還跟朋友合資開快閃店。

好識投資的Jason，除了有樓，還跟朋友合資開快閃店。

Phoebus覺得跟Sica合作開綜藝對演群戲冇幫助，「望住Sica要用啲力去搣甩佢平時做綜藝個白痴樣，劇入面佢好有自信衝出嚟，我要睇佢唔起，但現實我會想撩佢玩。」34歲Jason更投訴因年紀差距，難以融入27歲Phoebus跟23歲Sica等人，「我哋3字頭，唔同佢哋廿幾歲，佢哋好犀利，拍完成日仲可以跳舞，我同陳安立、肥腸坐埋一邊望咋！」Sica即補飛：「後尾有特別遷就佢哋，大家捉五子棋，好似維園咁！」暗寸年長組似維園阿伯，Jason即呻：「唉！你明啦，睇唔起我哋啲叔叔，老人家唔被尊重，哈哈！」

Phoebus有一日「飛黃騰達」，就會一半錢給家人，一半錢做善事。

Sica如發達會支持其他創作人，「我冇經營能力唔使做老闆，淨係出錢。」

《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF

想睇更多精彩內容，請立即瀏覽「區區有申訴」活動專頁，https://bit.ly/41hgS9E

 

《星島頭條》新網站有更多精彩內容：http://www.stheadline.com/