專欄｜車路士險勝列斯聯 梅迪歷變真10號

今個禮拜真係冇乜時間睇波，因為掛住睇F1開季，但有愛隊點會唔支持呀，剛剛過去周中足總盃，車路士憑着干拿加歷查嘅絕殺，以3:2擊敗列斯聯。

今場正選擺出咗梅迪歷、馬度基、「細查」杜利奧查洛巴等副選球員，預咗呢場波係開放局面，比賽內容都真係一模一樣。好多位置上都可以見到副選球員一啲不足，繼續擺喺右邊嘅馬度基Decision Making好差，但係有一樣嘢係改善咗，就係識得幾時回後。

「細查」出任左中堅嘅位置，表現可以話非常之差，失第二球就係佢跟漏人，防守上好多企位都係唔穩陣。唔單止防守能力，出球能力都係好有問題，上半場有一球正正係左中堅嘅細查攞住個波，佢選擇推前，點知推咗去對手嘅Pressing Trap，結果俾人一夾即刻反擊，表現真係失望。

最後一位嘅梅迪歷，今場佢首次正選出任10號位，我覺得有一樣微細嘅改變，就係佢踢中間時，反而有更多空間望前，當佢攞住個波向前嘅時候，更加可以運用到佢嘅加速力，策動快速反擊，而身邊嘅隊友又可以跟到。下半場踢返左邊反而又變得綁手綁腳，因為佢要打側個身攞波時，經常都淨係望中間，但當佢一想加速就會推落一堆人到，所以只會變返回後，所以呢個改變係幾值得嘗試。
  三位後備球員表現都可以話平平，但究竟完季可以進步幾多，呢一個都係大問號。Willhappy

-----

《星島申訴王》推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ