何沛珈演爭仔戲Cut機攬住劉佩玥喊緋聞男友阮浩棕提早5小時到場服侍丨獨家

2024-03-04 07:00

TVB「胸猛小花」何沛珈（Roxanne）憑索爆身材成為焦點，自前年參加《香港小姐再競選》奪冠後曝光率大增，再於《新聞女王》中被性侵，兩分半鐘含淚獨白戲，睇到觀眾心都痛贏盡好評。成功彈起的Roxanne獲監製王心慰重用，在新劇《非份之罪》單元「恐怖情人」中孭重飛，孖住力捧姐仔劉佩玥(Moon)演出。日前兩人拍攝一場爭執戲，戲內爆Seed演繹，戲外喊到收唔到聲，Roxanne緋聞男友阮浩棕更全程照顧周到，暖男認証。採訪：方騫平攝影：鄧國良

劉佩玥帶住27歲何沛珈拍新劇孭重飛，更狂讚後者冇得頂。

何沛珈喊住哀求Moon放人。

當晚劉佩玥及何沛珈於火炭一所工廠大廈拍外景，劇情講述這對好姊妹因為阮浩棕嘅感情瓜葛發生爭執，兩人先口角繼而隻揪。雖然頭段未有阮浩棕戲份，但他以睇位為理由，提前5小時到場照顧緋聞女友Roxanne，遞水、遞紙巾外，又會幫手望吓個pad墊得好唔好，擔心女友拍動作戲會受傷，超細心。

緋聞男友阮浩棕好關心Roxanne。

阮浩棕無啦啦被鬧

由於係重頭動作戲，現場由武指指導兩人走位、推撞等動作，排咗幾次兩人就埋位自動波。鏡頭前Roxanne喊住哀求Moon讓愛，Moon超投入喊到聲嘶力竭，爆喊拒絕，兩人演得七情上面，相當入戲，投入到cut機後仍然喊到收唔到聲，要攬到實嚎哭1分鐘先平靜到情緒。喊到飽嘅Roxanne深呼吸一下，又喊又笑向在旁「暖男男友」發洩，怒斥：「臭男人好壞，男人真係信唔過！」無啦啦捱轟的阮浩棕，一臉尷尬為自己打圓場：「劇情需要、劇情需要…」

兩人Cut機後仍攬住喊到收唔到聲，阮浩棕唔敢講嘢。

瞓身肉搏好似真打

最後因為講唔掂數，兩女大打出手，Moon為求脫身大力將Roxanne推開，後者跌落紙箱火速爬起身追住Moon，然後全速撲向Moon後腿，被拖後腳的阿Moon就大大力用腳撐開Roxanne，兩人喺地下拉扯肉搏，非常肉緊，連劇組都忍唔住講兩句：「嘩！睇佢哋幾狠呀！所以唔好得罪女人。」雖然只係短短幾分鐘鏡頭，但因為要試位，演員又要加保護墊，加上拍唔同角度，足足搞咗成晚才大功告成，Roxanne喺阿Moon帶領下發揮到超水準演技。去年「馬來西亞最喜愛TVB女主角」劉佩玥睇好Roxanne「up and coming」：「佢工作態度好好，最重要會感恩。」

Moon大力將Roxanne推向紙箱。

Moon因為太投入，戲外都係咁喊。

兩人瞓身喺地上拉扯肉搏。

跑馬拉松keep身形

已習慣捱打的阿Moon笑言公司知她捱得兼抵打，所以呢幾年拍咗唔少動作戲，包括《城寨英雄》、《隱形戰隊》等，由一開始手腳唔協調，到𠵱家有少少進步。問到瞓身為公司搏到盡，係咪邁向視后必備元素？Moon強調做人好簡單，入行10年都只求今日好過昨日，做好自己，每一日過得開開心心。阮浩棕補充話：「演員唔係為獎而做好角色，最重要觀眾睇到有表現。」對於fit爆身形成為焦點，Roxanne說：「咁我跑開馬拉松，所以keep到身形。」她最慶幸由《寵愛Pet Pet》演開心護士；到《新聞女王》被性侵嘅堅強排球隊隊長，觀眾終於睇到她另一面。Moon再勁讚Roxanne：「佢真係好索㗎！𠵱家我哋再熟絡啲，睇到佢努力及勤力一面，佢仲好有心做主持，真係冇得頂。」