鄭俊弘度好免代溝妙法：介紹囝囝睇星爺 自爆做爸爸怪行跑步聽歌邊跑邊喊丨獨家
2024-03-08 07:00 
鄭俊弘（Fred）自囝囝鄭讚廷（Asher）出世後，即變「冧仔狂魔」，每日爭取親子時間之餘，還打算搵埋囝囝參與新歌，甚至連聽住歌跑步都會因為突然諗起囝囝而邊跑邊喊。最搞笑是Fred為怕日後同囝囝有代溝已諗定計仔，父子吹水橋樑就係周星馳作品，「將來兩父子齊講星爺台詞笑話，就唔會有代溝啦。」先祝佢「冇代溝計劃」成功，至於再做老竇，一講個仔停唔到的Fred確實有計劃，亦已跟老婆何雁詩商量好蛇年再生BB 。採訪：杜杜 攝影：Stanley 髮型及化妝:@joanne_starryavenue
Fred形容新劇《再見•枕邊人》的「凌振聲」是絕對的敗家仔，睇劇本時已疑惑角色咁衰可以點演，「成日驚觀眾唔鍾意，同埋會唔會好踩界呢？同導演商量後，享受咗嗰場戲先。」不過他預告角色並非得個壞字，未演過的他覺得特別好玩過癮，「初睇角色由頭憎到佢落腳指尾，但睇落有個轉捩點，呢個就要拿捏，點樣去鋪到最後，原來角色真係有感情，識得去孝順，希望大家睇到佢係衰，但唔係衰到貼地。」
演壞人當反面教材
Fred的囝囝Asher已21個月大，當然未識得睇電視劇，但他也不擔心Asher將來見他演壞人，會破壞好爸爸形象，「我咪同佢一齊睇囉！呢啲就唔好做嘞，當反面教材，叫佢睇咗爹哋做啲乖嘅嘢先，譬如《法證先鋒》嗰啲可以睇。」他更計劃適當時候介紹偶像作品給Asher認識，「有諗幾時畀周星馳嘅嘢佢睇，我哋成日講啲嘢都係圍繞住星爺啲笑話，佢唔識就會唔識笑，有代溝。」不過Fred目前很少開電視及智能電話畀囝囝睇，「寧願播啲歌畀佢聽，最好係畀佢玩多啲玩具，佢好鍾意彈琴就畀佢彈多啲，畀佢摸多啲嘢，好奇啲。」
新歌預埋囝囝一份
錫仔錫到燶的Fred，音樂作品都打算預Asher一份，「有諗過將來有首歌有一句，或者最尾嗰句係佢唱，用佢把聲。」他笑言不擔心沒有素材，因家人好像追星一樣瘋狂追拍Asher一舉一動，「日日影，有好多相又拍片，老婆又拍，佢婆婆公公又拍，依家有電話係非常好，我問我媽有冇我細個啲相，都係得幾張咋，片就真係冇。」Fred坦認做了爸爸連聽歌口味都有轉變，「以前會聽《陀飛輪》，正呀！依家聽啲勵志嘅歌就會好感動，真係想將最好嘅畀小朋友，佢哋係我哋嘅未來。」他更自爆做爸爸後的怪行，「聽Eason首《大個女》，唔知係咪生咗小朋友，真係好感動，跑步時聽到『天佑我的愛人』（《每一個明天》）聽到喊，但呢首係好開心嘅歌，聽到『若我不普通變得堅毅無忌』，又覺得係講我個仔令到我咁，真係一路跑步一路喊，聽呢啲歌有好唔同嘅感覺。」
計劃蛇年再做爸爸
提到今年正式帶Asher拜年，Fred越講越興奮，「今年喺香港過年，好多朋友同屋企人嚟拜年，我哋又帶佢出去，幫佢買埋賀年裝束，今日做皇帝仔，聽日做封利是仔啦，好開心㗎！」早已被Asher融化的他，雖然好想再做老竇，但因何雁詩工作忙碌，生BB要再計劃，「尤其是亞運之後，佢做好多唔同嘅綜藝節目，又會出歌，同埋會打返高爾夫球比賽，所以今年冇龍仔冇龍女，下年蛇年先生啦！」他現在不用開工便黐着囝囝，還有指定親子活動，「佢依家開始好嗲好黐身，一嘢成個頭瞓落嚟，我每晚都會同佢沖涼，沖涼之前逗佢笑，又會攬住喺床碌嚟碌去，已經玩3、4個字咁耐，沖完抹身搽cream，又同佢按摩，好好服務㗎！」Asher亦令以往恨生女的他完全改觀，皆因見到自己的Mini me好過癮，「生咗仔覺得都好正，我幻想唔到佢係女仔囉！佢有時發呆啲眼神，乜咁似我嘅，所以下個生仔定女都冇所謂。」
《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》新網站有更多精彩內容：http://www.stheadline.com/
最新回應