黃偉文爆Edan新歌靈感來自吳鎮宇 透露入行時曾訪問對方被徹底感動

呂爵安（Edan) 昨日（4月1日）愚人節出推出新歌《油麻地莎士比亞》，歌曲主要講述一個中文水平很低的男生，每日都寫一首詩送給喜歡的女生，字體核突，用字不夠漂亮，但其實這已是男生認識的字入面，最靚的用字，歌曲想表達誠意同心意，比出來成品有多好來得緊要。而作為填詞人的黃偉文 (Wyman)昨晚就透露這份歌詞的靈感原來是來自吳鎮宇的名字，更大爆當年訪問吳鎮宇時，因對方一番說話，被徹底感動，非常難忘。Wyman 寫道︰「初出道時，只要有人俾機會，我乜都做，為求學嘢，與增加人生的接觸面（當然也可以吓幫補捉襟見肘的買衫錢）。做了電台幾年後，居然被一本當時很好銷量的八卦週刊邀請，每星期寫一篇明星專訪，後來當然發現其實真係唔係好適合自己，所以最後好似只係寫咗兩三期，但在那僅有的幾篇中，有一次是被安排訪問在藝員訓練班畢業了幾年，剛剛嶄露頭角，並且改用新藝名的吳鎭宇（本名「吳志強 」，我做晒功課㗎。）半新人訪問半新人。」

Edan與身在英國的Wyman開Live，大談新歌。

原來Edan新歌的由來是原自於吳鎮宇！

新歌想表達誠意同心意。

Wyman當年訪問吳鎮宇，被對方的答案徹底感動。

至今依然非常難忘，當年甚至有想喊的衝動！

早前MIRROR到英國開騷，也有與身在當地的Wyman相聚。

Edan多首作品均由Wyman填詞。

吳鎮宇為故事中的主角！

Wyman 提到當年發問得「懶尖銳」，他問到吳鎮宇為什麼要改名︰「我記得你初出道嘅時候，你係用真名吳志強嘅，而家改個藝名，係咪嫌真名太平凡呀？」他指吳鎮宇當時不慌不忙不慍不火地回答：「我爸爸媽媽其實都唔係受過好多教育，唔係識好多字，但係我相信，『吳志強 』一定係用咗佢哋一生所識嘅字𥚃面最好嗰兩個而為我改嘅。」Wyman 被對方的答案徹底感動，至今還非常難忘，他說︰「我聽了，即刻想喊，不只是羞愧於自己的懶牙尖嘴利，而是 ⋯⋯ 係愛呀！頂！作為一名普通程度有得揮的『黃偉文』，當然有雙重淚點。差不多30年後，這段故事變成了呂爵安的《油麻地 莎士比亞》。」Edan即留言表示︰「So touching!!!」而曾與吳鎮宇合作過的吳君如亦留言問道︰「咁！邊個改佢叫吳鎮宇呢？」有網民回覆君如謂：「有個睇相佬幫佢改，之後佢仲介紹俾歐陽耀泉，改名做歐陽震華…」

Wyman將30年前故事交給Edan

另外，Edan 昨晚亦有在社交網開直播宣傳新歌，而身在英國的Wyman，更是首次join 歌手的live。Wyman透露Edan本來是想寫一隻好浪漫好浪漫好浪漫的情歌，後來，他決定將這個袋了30年的故事交給Edan去唱，並笑言在交詞時，有如send求職信一樣，「好似寫求職信咁，send咗畀佢，都好驚落選唔得，不過大家都work咗咁耐，已有種互相信任，包括大家都知對大家好，所以呢個真係好想畀一啲合作得好開心嘅歌手。」他再次解釋歌詞背後的意義：「吳鎮宇爸媽，用最多嘅愛去幫個仔改名，咁《油麻地莎士比亞》，內容關於最多嘅愛去示愛，我亦係用最多愛去寫呢份歌詞。呢個係我人生首次，跟車join歌手開live。」

 

《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF

想睇更多精彩內容，請立即瀏覽「區區有申訴」活動專頁，https://bit.ly/41hgS9E

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ