陳慧敏首搞Show超吃力:贊助都要自己傾 林夕歌詞好到肉失戀喊住錄歌丨獨家
2024-04-19 06:00 
陳慧敏推出新歌《拯救我自己》，兼宣佈5月舉行演唱會《趁我們還有___ 2024》。新歌再次邀得林夕填詞，她稱是再次摑醒自己之作，而她錄音時剛跟前度分手，搞到要喊住唱。由於是慧敏哥成立個人工作室後首辦的演唱會，她強調壓力雖大，但亦是學習的良機。採訪：杜杜 髮型:Aveda il Colpo : Kin
慧敏哥感激夕爺再度出手相助，亦驚訝對方每次都要她學習新課題，「收到歌時，我拍緊拖，嗰時唔覺得需要拯救自己！因為喺熱戀期都有啲擔心，驚進入唔到失戀狀態，點知錄音前嗰日，就同Long D男友分手，好邪！」她最初帶住憤怒情緒錄音，因歌詞「誰認可給你有權對我褒貶」好好發洩，但再沉澱再錄就喊出來，「唔係對方令到我幾咁傷心，係夕爺嘅詞提醒我要好好反省，好多被虐或受傷都係出於自願，係我畀權對方對我褒貶。」她形容夕爺上次《十年如一日》摑了她一巴，今次摑了兩巴，從而學識在一段關係中不要失去自我，「仲會唔會一秒沉船？我係相信直覺嘅人，應該仲係咁勇敢，但提醒自己唔可以為對方改變太多。」
The Hertz任音樂總監
演唱會主題《趁我們還有___ 2024》玩填充，是慧敏哥睇到大家經歷幾年疫情有感而發，「面對咁多生離死別會談論失去，會講以前點，𠵱家冇咗、變咗，情緒同氣氛咁憂愁，有咩可以令大家好啲，有咩我哋需要珍惜同捉緊。」今次她首度邀請樂隊The Hertz任音樂總監，「佢哋係好有想法嘅樂隊，我好期待。」由於是她成立個人工作室後首次搞騷，她覺得相當吃力，但亦視為學習機會，「大小事都經我，連贊助都係自己傾，有少少意外會咁吃力，有啲嘢真係做唔嚟要交畀人，呢個係最大挑戰，以往我好鍾意自己解決問題，點樣令到大家互相配合，係好值得學習！」
《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》新網站有更多精彩內容：http://www.stheadline.com/
最新回應