54歲李綺虹懶扮靚愛自然：唔使搞咁多嘢 逾10年冇拍戲興𡚒演黑幫大家姐丨獨家

54歲李綺虹最近由加拿大返港，同行還有加拿大籍老公Corey Solomonson及19歲全職運動員囝囝Sebastian。任職精神科護士的綺虹，去年拍新戲《Ruthless Bastards》，逾10年冇拍戲的她強調冇退出幕前，有啱角色仍會演戲。提到早前在社交平台Po素顏相成熱話，綺虹覺得奇怪，又自言懶化妝和護膚，因再拍戲才扚起心肝扮靚。採訪：杜杜 攝影：譚志光 髮型:Ivan Lee@ IL COLPO 化妝:Kinki Wong地:The AIR (The ONE)

綺虹透露方鐵偉導演已邀她再拍兩套戲，未來仍有機會見到她演出。

綺虹跟老公Corey 和囝囝Sebastian感情要好。

綺虹在加拿大住在郊區，跟專心練習冬季兩項（Biathlon，即結合越野滑雪和射擊）的囝囝分開住，主動提出返港的囝囝，為了此行苦練廣東話，他即場示範，「唔該，畀杯可樂我」但侍應只回他英文，令他相當失望。綺虹稱囝囝自12歲後未有返港，因在當地間中見公公婆婆，所以講廣東話麻麻，但聽亦OK。

綺虹跟囝囝一齊訪問，Sebastian基本上聽得明內容。

19歲的Sebastian自小熱愛運動，幾歲已開始玩Biathlon。

已達國家級水平的Sebastian，不時在Biathlon比賽中奪冠。

囝囝探班見武師斷手嚇親

在當地做精神科護士的綺虹，去年底拍了加拿大動作電影《Ruthless Bastards》，她稱因認識曾任特技演員，拍過《飛鷹計劃》等電影的方鐵偉（Bruce Fontaine）導演，「佢以前喺香港跟大哥（成龍）做武師，佢喺網上聯絡我。」由於她超過10年冇演戲，接拍後擔心應付不到，要導演心理輔導，「我話唔知得唔得，會NG太多次，拖慢進度，佢反而驚我唔拍，話可以逐句逐句嚟。」

綺虹希望有發行肯將電影《Ruthless Bastards》安排在港上映。

戲中綺虹演經營地下賭場的黑道大家姐「周太」。

綺虹飾演經營地下賭場的黑道大家姐「周太」，有廣東話對白，由於其他亞洲演員中文更差，全靠她指導，「我喺香港中文最差，去到變咗中文最叻，我幫人哋發音，係咪好搞笑呢？！」最可惜她未有機會大顯身手，「今次個個有得威，我冇得有型。」囝囝知她是演員，亦有看過她的作品，「大打嗰場老公同囝囝嚟現場，我以為囝囝會好有興趣，但佢話『No』，覺得好危險，因為睇住武師打筋斗上枱，再打爛張枱，個武師真係斷咗隻手。」問Sebastian有冇興趣當演員，他說有機會都想嘗試。

綺虹在戲中不用打，「呢個最失望！動作片唔畀我打。」

1994年，綺虹參加港姐奪得季軍和最受傳媒歡迎獎入行。

支持囝囝為追夢棄讀大學

綺虹強調從未息影，「冇退出，係越嚟越少人邀請就冇拍！」她坦認已半退休狀態，近5年做護士都是想做才做，演出亦不是為錢，如2013年客串好友楊采妮執導電影《聖誕玫瑰》，「你唔畀錢我都會做㗎，哈哈！幫朋友，好玩，有旅遊，好似上次同ViuTV去日本。」當年因工作量少，她決定返加拿大定居，笑言搵工令她好傷心，「麵包舖同油站都唔請，好失敗。」最後她想到媽咪患精神病，就修讀精神科護士課程，「冇大學證書都讀得，話晒大學畢業，好似有少少退步。」她覺得護士很有意義，體力容許都會一直做，「做到70、80歲，真係enjoy！」

1994年，綺虹拍住黎明主演劇集《阿Sir早晨》。

2019年，綺虹為ViuTV拍攝《香港親善小姐》。

綺虹又好支持囝囝為追夢，放棄讀大學，轉做全職運動員，「我會緊張啲人問佢點解唔讀大學？最重要佢開心，做自己喜歡嘅嘢，有咩問題呢！？」對於當年誤打誤撞參選港姐，她稱選完就過另一種生活，「好多謝香港觀眾同所有人。」她又重提當年投資失利，「喺香港見投資者，當時喺加拿大起緊屋，又蝕咗少少錢，好緊張，經理人話『你緊張係因為你有錢去投資、買樓，如果你冇咁多錢，唔會緊張，只會努力去打工』，呢啲係物質嘅煩惱，唔係冇飯食嘅煩惱。」

綺虹與Corey於2004年結婚，並誕下 Sebastian。

綺虹跟老公在加拿大過住半退休生活。

早前綺虹貼出素顏相被討論，她稱試着自然老去，「唔使搞咁多嘢，見香港之外，外國啲女仔20幾歲已經整，我想睇吓完全冇傷口，20、30年後個樣會點，同人哋比較吓。」她冇做幕前，不但少化妝，連護膚都懶，「我近年眼有問題，油脂分泌塞住，醫生搵Facial儀器幫我通返，又送咗啲護膚品畀我，一搽啲皮膚光咗，有少少上癮，同埋受拍戲刺激，畀啲錢整返靚自己。」

綺虹早前貼上素顏近照，引起外界熱烈討論。

綺虹直認以往很懶化妝和護膚。

《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF

 

想睇更多精彩內容，請立即瀏覽「區區有申訴」活動專頁，https://bit.ly/41hgS9E

 

《星島頭條》新網站有更多精彩內容：http://www.stheadline.com/