星8卦｜「姣婆」搵藝人着數搭棚拍戲 無老細支持人間蒸發

娛樂圈啲人最叻做乜？「搭棚」囉！總有好多人明明係騙子，但依然有人信，有人落搭。「姣婆」做幕後咁多年，但佢一直恃住自己有兩分姿色，後生周圍食仔，啲男星以為靠佢勢力可以有機會，其實好多都係俾佢騙色，最後都係得個桔。

早排佢又搭咗個靚棚，話有大老闆開戲，搵咗公司一班阿哥阿姐度晒期出嚟。事實係佢同一個大陸佬合作，先有咗個靚卡士就出去搵老細，而兩個人就從中搵錢。呢個市道邊有咁易搵老闆肯出錢，佢打鑼打鼓話有大公司拎錢，但嗰條數都未夠畀男女主角嘅人工。最衰係佢搵咗「小花」同「盲炳」畀咗期，但成半年都無聲氣，搞到同時期嘅Job都唔敢接 。

成班人見勢色唔對，尤其係「盲炳」一直唔想拍，結果無下文，日日分頭打畀「姣婆」，佢竟然開多個電話，將之前全部嘅聯絡凍結無一個人搵到佢，連返公司挖佢都無影俠，而家天怒人怨，因為自己無油水抽就人間蒸發，成日恃住有公司撐，將班藝人當係自己嘅工具同籌碼，利用到盡，但最慘無人敢出嚟鬧佢，由得佢繼續妖孽橫行。

 

相關文章：

星8卦｜「叻叻」靠賣料賺人情外快 藝人敢怒不敢言任由宰割

星8卦｜「扮嘢」結婚玩神秘得罪全世界 生女想復出被嫌棄

星8卦｜「阿靚」被「紅人」抛棄 閃嫁「英雄」誤墮騙局做搖錢樹

《星島申訴王》推出全新項目「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF

想睇更多精彩內容，請立即瀏覽「區區有申訴」活動專頁，https://bit.ly/41hgS9E

緊貼最新最快新聞資訊，請立即下載星島頭條App：https://bit.ly/3Q29Vow