20歲林智樂自爆失聲經歷嚇餐死　感激牛仔布達人林德信仗義拍MV丨獨家

2024-05-17 06:00

林智樂（Felix）新歌《年輪海》以成長為主題，較以往作品有更多想法，MV在牛仔布洗水廠取景，扮演時裝設計師的他嘗試製作牛仔服裝過程。他希望推出每首歌都能延續話題性，還化身畫家跟兩名藝術家一同創作畫作。採訪：杜杜攝影：譚志光場地:Mira Place

Felix預告跟潘靜文在周六舉行的演唱會中，會一齊做棟篤笑。

Felix因為拿了新人獎，做歌可以更放鬆，「依家出咗大海，浮吓先，今年係嘗試嘅一年，試多啲唔同曲風。」而請到Cousin Fung作曲就全靠坤哥，「喺叱咤後台同經理人傾想搵佢，經理人就帶我去搵坤哥（吳業坤），坤哥9秒9開咗電話錄語音功能，我講咗想點，隔咗一排就收到Cousin嘅兩首Demo，揀咗比較小品啲嘅《年輪海》。」

Felix去澳門拍完《聲夢1＋2》未夠喉，希望可出埠拍。

全靠針灸救聲

不過Felix錄歌前一度失聲，搞到要重錄，「錄音時我把聲係最差，其實新城頒獎禮前一晚，已經中咗流感，食藥撳住仲上到台唱，但一落台半個鐘就失晒聲。」不過20歲的他自恃後生，一直冇睇醫生，加上去澳門拍《聲夢1＋2》喪嗌幾日，返港就出事，「連續錄咗3次，聽返自己都過唔到，同經理人講前後唔好安排工作，加做針灸，先完成到首歌。」由於他本月18日會跟張馳豪和潘靜文開騷，他已積極做針灸和跑步，希望以最佳狀態演出。

新城頒獎禮當晚，Felix上台表演後就失聲。

Felix拍《年輪海》MV演時裝設計師好神似，全因現場有專家教路。

Felix操作牛仔布洗水廠的機器，亦有專人從旁協助。

為配合《年輪海》主題，MV在牛仔布洗水廠取景，Felix解釋：「講成長就好似牛仔布嘅製作過程一樣，有好多歷練，仲搵咗牛仔布達人林德信做彩蛋，佢好Nice，希望下次同佢有音樂上嘅合作！」Felix又跟兩名藝術家舉行以《年輪海》為主題的畫展，「做計劃書時用AI設計咗幅畫，咁不如再搵藝術家合作，將呢幅畫再加啲創作，變成11幅唔同嘅畫仲搞埋展覽，係好難得嘅創作經驗。」