曾國祥承認王敏奕加入TVB有壓力：同佢做心理輔導超強抱負提拔年輕電影人帶港劇登串流平台丨獨家

2024-06-19 07:00

曾國祥（Derek）成功衝出國際為 Netflix科幻劇《三體》擔任聯合導演，因為串流平台滲透力強，他認為較電影更能提升知名度，所以未來會多製作本土劇，希望能將港劇帶上串流平台，令到香港電影電視人可以多條路發展，非常有抱負。不過，滿肚計劃的他冇打算跟老竇曾志偉揸旗的TVB合作。至於老婆接連拍劇都有非常厲害的親熱戲，曾導演完全唔介意，拋下一句，「我都做過演員。」答得好瀟洒。採訪：杜杜攝影：朱偉彥場地:ULURU

Derek認為香港有很多本土特色的題材，可作為劇集素材。

Derek開心成為第二屆「Eye Catcher Global」（ECG）大使，並擔任競賽評審，「好想幫到年青人講故事，我都經歷過𡃁仔時好想拍片，幫到盡量幫。年青人講故事個慾望同初衷好緊要，唔好俾太多技術嘅嘢規限，原意最珍貴，入咗行呢樣嘢會慢慢磨滅。」由參賽者變評審，他笑言生理變化多於心理，「因為老咗好多。」年屆44的他自問初心不變，「睇到鍾意嘅電影、書，仲係有好興奮感覺，慾望仲喺度，心態冇太大變化。」他還用其他方式幫助年輕電影人，最近就為內地導演的新作配音，「佢想搵個有廣東腔嘅人去配段普通話對白，之前喺影展認識，俾佢熱誠打動，我冇睇個故事就應承做，我經歷過搵人幫手，配音係舉手之勞啫！」就算新導演邀合作，一樣樂意，「有搵新導演傾新project，個故事雙方都有感覺先一齊做。」

Derek出任第二屆「Eye Catcher Global」大使，並擔任競賽評審。

靠《少年的你》衝出國際

Derek出任Netflix科幻劇《三體》其中兩集的導演，他認為能衝出國際，代表香港角逐第93屆奧斯卡最佳國際影片的《少年的你》幫助最大，「去咗好多影展，又有啲獎，多咗好多國家嘅人覺得呢個導演可以傾吓偈，先有《三體》嘅機會。」他認為亞洲題材抬頭，要好好把握，「呢幾年見到好多好成功嘅亞洲題材戲及劇，有呢啲例子，越嚟越多外國公司想做啲好東方或亞洲故事，多咗好多機會，需要亞洲電影人去執行呢啲故仔。」他認為成長背景，對事業發展有一定幫助，「我覺得自己有少少邊緣，喺香港土生土長，11歲移民加拿大就係二等公民，讀完書返香港，好多人覺得我係CBC，又有少少邊緣，喺香港做電影再到內地工作，又覺得我係香港導演，依家到美國做嘢，哈哈！人哋又覺得你係中國導演，但keep住嗰種邊緣化，畀到角度同perspective我去創作。」

Derek憑2019年執導的《少年的你》奠定業界地位。

Derek憑《少年的你》奪得「香港電影評論學會」最佳導演。

在加拿大長大的Derek，認為有助擴濶視野。

製作本土劇吸引外國人睇

Derek最新電影計劃是改篇美藉華人女作家的小說，預計今年秋天在美國開拍，對於再次改篇小說，他搞笑解釋：「懶囉！由零開發好費時。每次都係咁啱遇到好鍾意嘅小說，好想去做。」至於何時看到他的港產作品，他表示開發故事中，「希望做到香港本土故事，但世界各地嘅人都會有興趣睇。」不過他放眼並非電影巿場，「希望香港本土劇，去到國際平台，其實唔止我，好多導演、老闆都努力緊，覺得可以做到啲劇，出到出面，又有多條路。」他認同網上平台的滲透力比電影更高，「撳個制睇到，我拍完《三體》，喺香港、台灣或者內地，唔識我嘅人話好鍾意個劇，之前拍戲都未試過有人無端端話睇過我部戲。」提到爸爸曾志偉主理的TVB，亦有網上平台myTV SUPER，他就未想合作，「暫時想同啲國際平台合作，冇諗過同本地電視台合作住。」

Derek為 Netflix科幻劇《三體》出任聯合導演。

Derek暫不考慮跟爸爸曾志偉主理的TVB合作。

Derek很想嘗試執導動作片，「睇動作片長大。」

兩公婆工作上會互畀意見

講到王敏奕的新朵「最美小三」，Derek認為反映了太太有好成績，「佢係好好嘅演員，睇到佢有好嘅劇，好嘅角色，無論咩朵都好，都係一個認可，好戥佢開心！」而太太連續在《婚後事》和《家族樂耀之繼承者》有大量親熱戲，他完全不介意，「我都做過演員，演員工作有呢啲戲就冇辦法。」至於會否夫妻檔合作？「工作同生活唔好溝埋一齊，件事會好複雜，我同佢有共識。佢收到劇本會同我傾，我會畀意見，我嘅劇本佢又會畀意見。」他承認王敏奕加入TVB後有壓力，亦有為她做心理輔導，「一路同佢講，做好自己本份大家會睇到，實有好多說話，又會話你靠關係，話我靠老竇都講咗咁多年，客觀嘅人見到你努力做好自己嘅嘢，自然會證明到自己，盡量唔好太在意呢啲說話，我對佢好有信心。」