港股收復多條平均線 調整或完成｜古天后

6月20日，部份時間有陽光，有幾陣驟雨，初時局部地區有雷暴，日間天氣炎熱。美國隔晚假期，美股休市，周二美股三大指數仍然反覆上升，標指更創今年內第31次收市新高。不過，歐洲股市卻仍未能受惠，三大股市個別發展，喺法國政治危機升溫下，法國CAC指數跌0.77%；德國DAX指數跌0.35%，只有英國股市升0.17%。

美匯指數回吐0.1%，見105.153，但仍守於105水平之上，維持強勢，人民幣兌美元匯價持續偏軟，目前處於7.28水平。多位聯儲局官員周二強調減息前需要有更多通脹放緩訊號，當中部分提到對減息時機睇法。聯儲局理事Adriana Kugler表示，若經濟發展符合預期，今年稍後某個時間可能適合減息。聖路易斯聯儲銀行總裁Alberto Musalem新官上任後首次發表演說，表示可能需要多過一個季度嘅數據來支持減息。

不過，安聯首席經濟顧問Mohamed El-Erian喺英國《金融時報》發表評論文章，指聯儲局減息宜早不宜遲，推後下調利率最終或需要展開進取減息周期，增加衰退風險。聯儲局利率前景引發議論，麥格理將啟動減息日期預測，由2025年首季提前到今年12月，主要因為美國近期通脹放緩，以及就業市場訊息混亂。

科創八條消息一出 港股如坐火箭

至於港股噚日表現強勁，中證監於上海陸家嘴論壇舉行時，發布《關於深化科創板改革 服務科技創新和新質生產力發展的八條措施》，進一步深化改革，提升對新產業新業態新技術包容性，發揮資本市場功能，更好服務中國式現代化大局。科創八條消息一出，港股如坐火箭，港股收市勁升514點，一舉收復50日線18008點、10日線18171點及20日線18383點，當中又以中持估概股股最受追捧，成交略為回升至1127.98億，較周二成交額急增22%。國新投資繼去年12月增持中證國新央企科技類指數基金後，周三宣布認購3隻發行中嘅中證國新港股通央企紅利ETF，即間接買入喺港股上市嘅央企股份。儘管未有披露認購金額，但指出堅定睇好港股上市央企。有關消息傳出，隨即利好市場氣氛。

今次中證監提出推動「科創板八條」，改革持續，連同過去大半年推出嘅新「國九條」，長遠有助股市發揮集資融資功能，預期港股亦能受惠。加上國家隊支持，向市場發放睇好香港上市央企股訊息，港股昨日不僅一口氣收復多條移動平均線，同時顯著升穿由19706點上月高位所延伸嘅下降軌，收18430點，14天RSI重上50強弱分界之上收53，技術指標及走勢大為改善。若然今日出現小幅回吐後再升，仍守於20日線之上，可確認扭轉跌勢，短線將回試6月初高位18724點。今日初步阻力為18500點，而18694點至18776點於5月29日所遺下嘅下跌裂口阻力更大。初步支持為18300點，18200點及10日線料有更大支持。除非今明兩日戲劇性地急跌回落重返10日線水平之下，否則港股可扭轉劣勢，於6月餘下時間向日線保力加通道頂部進發。

古天后日誌

——

由即日起至6月20日，只要參加「市民對特區政府滿意度調查」問卷，即有機會贏取Panasonic護髮風筒、Casetify充電器、大家樂$50餐飲券等豐富禮品。即點擊 https://bit.ly/4csd4qL

緊貼最新最快新聞資訊，請立即下載星島頭條App：https://bit.ly/3Q29Vow