專欄│上車落車 未到終站

暑假時間，除咗歐國盃同美洲盃進入最後階段，而「我轟」車路士不知不覺間有好多動作，因為我哋換咗新教練馬列斯卡。

先睇上車嘅部分，其實已經有艾達拉比奧約同達斯貝利賀爾等5人上咗呢架倫敦大巴士，可能有部分名字大家都唔認識，而小弟對馬克古奧、連拿度維加、奧馬利基利文都係加盟後才會有深入少少認識，呢架巴士永遠唔能夠令人有信心可以向前，我唔係話要睇死架車，或者我哋終於搵到一個一鳴驚人嘅好司機，眼光獨到。

但我睇落，領隊話要搵個多位置都踢到嘅球員，而呢5個先唔好講位置，級數都令人擔心，除咗3,000萬鎊嘅達斯貝利賀爾，上季係馬列斯卡治下李斯特城嘅核心，再加上表現真係好，仲有機會一拍即合，其餘4位真係要再借出去浸吓。

有人上車就總有人落車，唔係架巴士真係滿座行唔郁喇，當中包括伊恩馬迪臣、利維斯賀爾、奧馬利赫捷臣、薛耶治同堤亞高施華，薛耶治而家先正式宣布離隊其實幾搞笑，堤亞高施華對中堅影響性極大，始終唔可以留隊指導一班新晉中堅，後防線幾令人擔心，至於赫捷臣，如果大家仲記得，佢係阿仙奴過嚟嘅青訓，最尾賣咗俾今季升班嘅葉士域治，佢今年係英冠表現係好出色，2300萬鎊絕對抵放，而賀爾同馬迪臣都係有上陣過車路士嘅青訓，兩個嘅能力其實都係對於一隊嚟講差少少，適逢有球隊需要其實放都無可厚非嘅。

上車落車，仲有排演，即管睇吓車路士嚟緊又有咩大收購，或者係大出血。Willhappy