專欄│混沌過後必能成長

要知道足球從來唔好灰，新教練代表一個新希望，新球員代表一個新開始，車路士過咗2個賽季，只有動盪與失望。而我開始亦都有自我懷疑，對自我講波風格係咪真係啱，別人睇落好光鮮，有唔同機會，我好多謝唔同人俾嘅機會，但其實好多時我都對自己唔滿意。

每場波嘅要求都唔同，車路士上季對護級隊簡直係唔及格，不敵般尼同錫菲聯，攻門唔能夠展現到效率，好多細節處理都唔夠好。而我係每一個節目細節亦都處理得不夠，例如接波拋波點樣可以舒服啲，舒服得嚟點樣可以再搞笑啲，真係好難。

另外，呢兩季車路士嘅風格上，我睇得出係想控球在腳，華麗咁入每一球，有邊個唔想，但係How？冇能力拆大巴，好多波都係靠Transition得到Benefit；好似我由網台到電視台，係咪仲可以好似以前咁大鳴大放，係定位上唔夠清晰，太易跟咗人地嘅節奏，消失咗自己，定從來我都冇自己？

或者球會同我都到咗樽頸，球會要冠軍，我要成為評述界No.1，我哋彼此都入咗個樽頸。由網台到電視台嘅陣痛期，但只有不停做，有唔同嘅機會就係機會，奧運係一個與眾不同嘅機會，希望到時可以係免費電視見到我時，會係一個完全唔同嘅我。我係一支萬金油，都係一個萬能插，同時係萬能刀，又可以成長一番，同今季車路士一樣，新開始再嚟過。Willhappy