CotaBoii慣性唔見銀包唔敢周圍呻　21歲唔大唔細想學識搵平衡丨獨家

《全民造星V》攞第7的Taco（黃泓祖），去年以Rapper藝名「CotaBoii」加盟Sony 旗下「Green Music」正式出道，繼年初推出《Mr. Nobody》後，最近再有新作《兜圈圈》。歌曲靈感是他覺得生活彷彿在不斷兜圈，踏入21歲尷尬年齡亦令他有點進退失據，慣性唔見銀包也不敢周圍呻，他希望盡快搵到各方面平衡，有更多進步和成長。採訪：杜杜

CotaBoii認為21歲已經大個仔，但自問內心仍是未夠成熟。

去年CotaBoii參加《造星V》得第7，令知名度大增。

新歌《兜圈圈》CotaBoii繼續包辦曲詞創作，靈感取材自生活，「每日生活好重複，好似喺度兜緊圈咁好冇新意，於是就諗到呢首歌。」他有感21歲是個尷尬年紀，任何事要開始對自己負責，但其實內心還是個大細路，「好似我成日唔見銀包，尋日先啱啱唔見咗，以前我會好燥好𤷪，又會同屋企人講，周圍去呻，𠵱家要學識有耐性，冷靜啲處理，大個咗要對自己負責，所以我決定咗唔夠成熟，就唔用銀包住，哈哈！」

CotaBoii簽公司後，今年初推出出道作《Mr. Nobody》。

CotaBoii有感生活經常不斷重複，因而創作《兜圈圈》。

幫人睇舖賺外快

CotaBoii在《兜圈圈》更請來「妹妹CotaSis」一齊合作，「創作呢首歌嘅時候想搵把女聲，嗰時好興AI就試吓Jam落去，發現幾夾，就有咗『CotaSis』出現。」不過他笑言不會給「妹妹」出頭天，下次創作未會再預她，「搵佢孭飛一首歌應該冇可能，下次未必會用佢，因為佢唔識唱歌㗎！亦都現場演繹唔到，佢喺後面支持我得啦！」他更堅拒仿傚羅志祥和張敬軒，反串以「CotaSis」造型現身，「係都搵人扮就算啦！我冇偶像包袱，但係有 Rapper包袱，唔型好難做，同埋保護返佢圈外人身份，哈哈！」

CotaBoii在《兜圈圈》MV中，扮演不同職業打工仔。

CotaBoii仍未有信心開騷及出碟，希望先儲更多歌及經驗。

除了生活學識平衡外，CotaBoii希望在音樂創作上也可攞到平衡，「我在意製作音樂過程有冇袋到啲新嘢？！係咪真係符合我理想中畫面？！我仲學緊點樣喺巿場同自己想表達嘅嘢上面攞個平衡，呢個課題唔係1、2年可以領悟到。」他計劃下半年再推出兩首新作，但會放棄用電子音樂，「之前兩首都用咗，想用返鋼琴嗰啲比較原始嘅樂器，等人睇到多啲我唔同面向。」他簽公司後可專心創作，空閒時間更多，竟然有意去做兼職，「我諗住去幫朋友睇舖，反正唔做嘢好悶，我好怕熱又唔想周圍去，睇舖可以接觸多啲人，對搵靈感有幫助，仲可以順便儲錢去旅行。」

CotaBoii做兼職可以儲錢，跟女友去旅行拍拖。