26歲麗英入行後好自卑：啲女仔又高眼又大 遭舊愛嫌棄冇晒自信嚇到唔敢拍拖丨獨家

麗英（鄧麗英）今年推出「愛情3部曲」企劃，年初的《美男子圖鑑》玩收集男神過足癮，新歌《解咒說明書》就講情傷。提到情史，26歲的麗英收起笑容，指學生妹時期被舊愛狠飛，原因竟然同衣著有關，此次情傷更令她冇晒自信，唔敢再拍拖。採訪：杜杜 攝影：林賓尼 髮型:Marco Li化妝:Hulda Tsai 場地:火土燒肉hearth Yakiniku by Atum

麗英預告年底除了推出「愛情3部曲」最終章，還會舉行迷你演唱會。

麗英預告年底除了推出「愛情3部曲」最終章，還會舉行迷你演唱會。

麗英推出「愛情3部曲」，有感這類題材較令歌迷有共鳴，「3部曲係上年目標，想啲歌有個系列，3首歌寫愛情嘅唔同狀態，好似第1首《美男子圖鑑》講對愛情憧憬，喺花多眼亂嘅世界揀鍾意嘅人，《解咒》就講失戀、情傷嘅狀態，至於第3首就唔講住，想保持神秘感。」之後她忍唔住「劇透」壓軸作品計劃年底推出，「歌曲系列用書做主題，好似圖鑑同說明書，第三首都係同書有關。」

《美男子圖鑑》麗英繼續以癡女開心一面示人。

年初推出《美男子圖鑑》，麗英開心搵來Ian聲演。

曾因失戀不斷自責

《解咒》跟麗英一貫的歌曲風格相反，是她刻意安排，「以往我都係用開心樂觀一面示人，其實都有啲深刻回憶，想同大家分享。《解咒說明書》係我分手經歷，好sad。」該段感情傷透她的心，事關分手原因是被男方嫌棄，「對方嫌我着得太多T恤牛仔褲，呢個竟然係其中一個分手理由，當時我震驚加非常傷心。」她做最真實的自己竟被指摘，覺得好無奈，「着T恤牛仔褲係我最舒服嘅狀態，我識佢之前成日咁着，但無奈冇咗愛喺裹面，先會有咁嘅變化。」

日本拍《解咒》MV，3日要趕12個景好辛苦，但因為景靚，麗英覺得好值得。

MV其中一個靚景在宇都宮隧道拍攝，仲要夾埋橋上火車經過。

這段「嫌棄之戀」在麗英讀書時發生，雖然只維持1年多，但卻刻骨銘心，「讀緊書仲係好green，拍過幾次拖就唔講嘞，但肯定係最深刻一次。」慘被狠飛後，她曾自困失戀黑房又不斷自責，更因嚇親唔敢再拍拖，「一直處於冇自信階段，成日問自己係咪好差，對價值觀亦有所懷疑，我係咪真係做錯咗呢？！好自卑。」時間是最好的療傷藥，「只要一個人唔鍾意你，你着咩都會唔鍾意你，講到尾佢都係唔再鍾意我啫！」回復清醒狀態的麗英，慢慢想通才得以自癒，「受咗情傷都唔應該定義自己價值，會學識點樣去愛自己。」她想以自身經歷，安慰受過情傷的人，「好多人喺愛情上俾人嫌棄過，但通常嫌棄對方唔夠上進或者好窮，外表好多問題，所以當時俾人嫌棄真係唔好受，以往要搵個鍾意你最真實嘅人，而唔係要迎合佢。」

麗英現在揀男友不會再失去自我，相處舒服最重要。

麗英現在揀男友不會再失去自我，相處舒服最重要。

拍MV勾起情傷回憶

因為「嫌棄之戀」受到沉重打擊，麗英學懂更愛自己，擇偶條件亦唔同晒，「𠵱家會focus自己多啲，同對方相處，佢接唔接受到我係一個咁樣嘅人？！亦會用最真實姿態去面對對方，相處得舒服，可以接受到我着T恤牛仔褲先係最好。」她坦認人行後仍然缺乏自信，到加入網台「小薯茄」，被粉絲讚賞才有改善，「自己都會嫌棄自己，點解行內嘅女仔，對眼又大又生得高，自己點做到？！但唔係囉！自己價值自己定，真誠係好大本領，將自己最真一面Show出嚟，自然會吸引到人。我入咗《小薯茄》，才華俾人欣賞到，所以就慢慢建立返自信。」

日本靚仔拳擊教練客串拍MV，對方更follow麗英ig，「但佢冇DM我。」

麗英拍MV嘅喊戲一take搞掂，因跟情傷經歷重叠。

去年為開個人騷學打拳的麗英，拍MV大派用場。

 《解咒》MV在日本和香港取景，有兩地型男任男主角，應該好開心，但麗英拍親感情戲都會勾起慘痛情傷回憶。「日本拍MV內容講攞洗完嘅衫返屋企，但個袋穿咗搞到一地係衫好狼狽，諗起以往跟男友一齊做，𠵱家只得自己一人而爆喊。」麗英現實失戀時都試過行一段好長嘅路返屋企，「等自己冷靜啲，唔想畀屋企人睇到我喊，有呢個感受，好快一take就搞掂，通常cut機會好快好返，但今次cut咗機仲喊緊。」而在港拍的甜蜜拍拖戲，她一樣不好受，「拍嗰時好難好開心，諗返起太多回憶，又係有啲重叠感覺，拍拖有幾開心，分手就會有幾唔開心。」

演香港男友的模特兒仲佳佳（Pete），麗英大讚對方畀到佢拍拖感覺。

麗英開騷見到家人在台下落淚好感觸。