66歲廖偉雄酷熱街邊拍廣告濕晒仲識笑從商34年身家過億慳家冇助手自己推篋丨獨家

2024-09-03 07:00

66歲的廖偉雄(燦神)自1990年開始棄演從商，移居內地開「燦神龍場」搞有機種植及有機肥雞，「阿燦米」成為全國十大品牌，近年在馬拉賣埋有機榴槤，做農夫種咗過億身家，每個零都有血有汗。雖然大把錢，但燦神冇話「印印腳」歎世界，仍然落手落腳做。日前下午佢就現身西貢拍廣告，33度高溫，加上一滴風都冇，冇助手嘅燦神自己推住篋，跟住工作人員四圍行取景拍攝，粉藍色恤衫濕到變深藍，但燦神仲笑笑口，拍攝時手部動作勁多，好似睇緊流動版金句meme圖，勁過癮。採訪:廖思慧

燦神同妙齡少女先在天后廟前拍攝。

燦神的兒子於2016年結婚，一家四口合照，新抱好靚喎。

「阿燦米」連續多年獲得北京中綠華夏、日本JONA和ECOCERT SA歐盟有機認證，亦得到《金獎大米》的獎項。

燦神在廣州興建「燦神龍場」開拓有機種植，農場亦自設水道，以天然瀑布灌溉蔬果。

有「榴槤醫生」之稱的燦神在馬拉發展有機榴槤種植。

燦神推出的燦榴槤。

廖偉雄在《網中人》飾演大陸新移民「程燦」紅遍華人地區，「阿燦」個名叫足45年。雖然棄視從商34年，但因為2007年拍過一輯《向世界出發》，節目中對香港現況有大量一針見血的金句，被網民封為「燦神」，有關meme圖連登仔仲用緊。

《福祿壽訓練學院》月前向燦神送上「榮譽博士」榮銜，後者攞獎仲扮喊，好玩嘢。

當年《笑聲救地球》的乜太超受歡迎

燦神MEME圖

冇助手自己顧自己
當日下午1時，發現燦神同妙齡少女在天后廟前拍攝，見前者手指指，講解中秋節，又提到叉燒月餅，只用手提電話拍攝的攝影師拍咗兩個Take就轉場。團隊計埋燦神有5個人，一個導演一個攝影師加兩個工作人員包括妙齡少女，個個自己顧自己，冇助手嘅燦神自己推住手提行李篋行足成條街，期間仲要喺行駛中嘅車附近穿過，一行人去到海傍附近繼續拍攝，發現燦神成個背脊已經濕晒。

兩人在天后廟前拍攝唔太耐

燦神講解中秋節，又提到叉燒月餅

條路唔平又曬仲要喺行駛中嘅車邊穿插，點解唔請個助手呀？

街坊行過見到燦神都有停低望吓佢

熱到癲揭高衫抹汗
一轉場即開始拍攝，見燦神多咗手部動作，又手指指又張開手，好似睇緊流動版meme圖，據知燦神拍緊月餅廣告，屬本地品牌但在內地銷售，睇攝影師長期Keep住直度拍攝，估計有關片段應該放在社交平台播放。燦神拍攝好流暢冇乜NG，見佢對住鏡頭不斷講講講，講足15分鐘就休息吓，再拎條毛巾仔塞入衫中間抹汗，唔覺意令白到反光的肚腩仔曝光。之後有遊客上前求合照，燦神冇Say No，影完仲笑笑口行埋一邊點支煙叉吓電。