32歲王敏奕感謝曾國祥肯睇TVB劇捧佢場結婚5年承認自私未想花時間教小朋友丨獨家

2024-09-07 07:00

王敏奕在《法證先鋒VI：倖存者的救贖》再演女警「霍寶英」，開心到日本取景，成為拍首個飲食節目的契機。早前曾國祥接受本報專訪時，表示跟老婆已有共識不生小朋友，更加不會夫妻檔合作，敏奕好認同，強調冇時間盡父母責任不如算嘞，亦認同跟老公各有主見難合作，但笑言：「可能我第時成為炙手可熱嘅演員，佢唔用我唔得呢！」採訪：杜杜攝影：朱偉彥髮型:Lupus Chui 化妝:Melody Chiu 場地:The AIR (The ONE)

32歲王敏奕坦認自私仍好享受工作，同曾國祥完全冇生B計劃。

王敏奕首次拍續集感覺好新鮮，亦份外緊張，「大家好鍾意『霍寶英』，再畀新鮮感人更加難。」她更興奮心想事成，終成為案件人物，對於觀眾投訴演出太少，她反而開心，「令到大家咁掛住『霍寶英』，係成功咗。」

劇中「寶英」跟「余Sir」在日本舉行婚禮。

敏奕跟黃宗澤繼《法證V》後再合作，默契更好。

拍飲食節目最怕變豬

該劇到日本取景，敏奕笑言這安排極佳，更成為她首拍飲食節目《感動味蕾美食餐廳100強—關西篇》的契機，「我喺大阪拍完《法證VI》，監製又喺嗰度做資料搜集，大家識咗食咗餐飯，就係嗰餐飯佢見到我都食得㗎喎！就問我有冇興趣拍飲食節目？」初時她都覺得好玩，但傾落開始擔心，「真係要食㗎喎！就開始驚，除咗1日要食好多餐，我唔係骨感，體質好容易有水腫，要用好多努力先可以得到可以上鏡嘅狀態，最驚肥到隻豬咁點算呢？！」開咗個靚頭，她有興趣再拍飲食節目，但要睇人腳，「同好朋友一齊做會好開心，如同糖妹一齊食嘢，寓工作於娛樂，綜藝要真實感先更有感染力，但真係要睇時間，好似今次有1個月空檔先做到。」

敏奕首拍飲食節目《感動味蕾美食餐廳100強—關西篇》。

敏奕最想跟好姊妹糖妹拍飲食節目，寓工作於娛樂。

敏奕戲中和現實都在日本結婚，她稱一家人都愛到當地，早前家族旅行地點亦是日本，「大家開會投票去邊，多數去日本同泰國，始終屋企人唔喺同一個地方，就到就盡量聚吓，好珍惜呢啲機會。」旅行是她叉電方法之一，但她就投訴同曾國祥去旅行會好攰，「我同佢有少少唔同，佢去旅行好chur，我就好hea，要瞓覺再瞓覺，淨係叫我食飯就算，哈哈！佢就要搞到好攰，又要去滑雪，一定要好早起身，佢都真係活力充沛嘅，哈哈！」

現實敏奕跟2019年結婚，也在日本舉行婚禮。

敏奕指曾國祥去旅行好chur，非常好活力。

湊青春期細佬當湊仔

曾國祥早前接受本報專訪時表示，跟各有各忙的敏奕有共識不生育，兩夫妻很享受目前狀態。敏奕認為不能負起父母責任，不如不生，「真係帶個生命嚟，要諗點樣教育佢，而教育係好花時間、心機，唔係畀錢就得，暫時我哋仲係自私啲，去享受吓自己生活先。」她又笑言看着16歲的胞弟成長，感受更深，「細個都仲會有啲幻想，有個小朋友會點，但湊大細佬踏入青少年，好可愛嘅小朋友去咗邊？！對我哋嚟講，同有個小朋友冇分別，經常都要處理青少年問題。」細佬是否不再黐她而失望？她就有啲無奈：「都叫黐嘅，但𠵱家青少年又黐又寸咁，窒吓我但又好錫我咁囉！」

敏奕跟曾國祥結婚5年，一直好恩愛。

敏奕跟家人關係密切，湊細16年的細佬（左二）當湊仔。

曾國祥又表明不介意老婆拍親熱戲，敏奕亦力讚老公，「我都覺得佢犀利㗎！大家去問呢啲問題，係好邏輯性、好合理，佢好直白覺得，我係演員嚟嘛！佢做導演如果遇到個女演員又要接呢套戲，明知有場咁嘅戲又唔肯演，咁就好唔專業，接得就要演好個角色。」曾國祥又透露會看另一半作品互相捧場，敏奕稱老公此舉令她好感動，「睇我嘅作品係sweet嘅，公平啲講，我嘅劇要投放好多時間去睇，佢嘅睇場首映就睇完，有人願意花時間睇晒你啲作品，係幸福嘅事，好多謝所有睇我作品嘅人，好感動。」對於曾國祥拒絕夫妻檔合作，敏奕認同兩人都好有主見，互畀意見已足夠，至於未來可有合作空間？她就搞笑話：「可能我第時成為炙手可熱嘅演員，佢唔用我唔得呢，哈哈！」