劉倩怡受離世愛犬啟發成立狗狗慈善基金 患情緒病6年諗通晒更愛老公鄭子誠丨獨家

劉倩怡近年專注電台工作鮮有幕前演出，在剛播畢的ViuTV劇《反起跑線聯盟2》驚喜現身，跟張松枝飾演林家熙父母。因為2018年患上情緒病，令她開始審視人生望修補遺憾，包括當年錯失的演戲機會及不懂維繫的友誼，以及更珍惜跟丈夫鄭子誠的關係，「1星期做足5晚電台，好欣賞佢。」另外，受到7月離世的愛犬妹妹啟發，她打算成立慈善基金，幫助更多狗狗得到愛。採訪：杜杜 場地:The AIR (The ONE)

因愛犬離世受打擊致生蛇，倩怡訪問當日未能拍照，之後提供靚相靚返晒。

倩怡不介意演嫲嫲角色，這次合作好愉快。

《反起跑2》導演劉偉恒接受本報訪問時透露，幾年前倩怡訪問他時曾提過仍渴望演戲，但機會難求，故構思林家熙父母角色，就想起倩怡這番話，聯絡時更獲對方道謝。倩怡稱劉偉恒找她時仍考慮，「機會嚟都會膽怯，唔知自己得唔得嘛！」她離開TVB約25年，有近20年沒演戲，承認有點遺憾，「當年做主持有好多機會，1996年奧運都做埋，但做戲就覺得嘥咗少少機會。」

喜歡小朋友的倩怡勁冧孫女「Yumi B」（王予殷），又指當年不生育因為椎間盤突出。

倩怡跟張松枝首合作，感激導演劉偉恒邀拍《反起跑2》。

父母4個月內相繼病逝

倩怡當年離開TVB，除因父母因癌病離世，還因年少氣盛，「嗰時年輕，喺TVB開始拍劇，一心以為會不斷搵我，突然間叫我去拍旅遊節目，好似返回原地，覺得等機會好辛苦，冇諗過有咁多機會已經好好，唔識諗，咁啱爸爸鼻烟癌轉到骨癌，媽媽有乳癌，4個月走晒，好大打擊，我就諗生命意義喺邊？由做電台到電視追緊啲嘢，但為咩呢？！好多呢啲問題。」離開TVB後，她去讀神學，再於基督教機構做節目監製，出過免費刊物《飛紙仔》和網上節目《快樂廚房》等，2018年更在尖沙嘴和西貢開護理用品店，瓣數多多，可惜生意只維持了幾個月，之後失去人生目標，更患上情緒病。

倩怡在TVB時有好多主持機會，1996年亞特蘭大奧運亦有份。

倩怡主持大騷時曾訪問郭富城和鄭秀文。

倩怡花了很多心機搞護理用品店，可惜最終未能成功。

倩怡現在一星期主持一晚港台節目《恬淡情懷》。

努力儲朋友維繫友情

患病日子，令倩怡有機會重新審視人生，「呢幾年諗咗好多嘢，係咪錯過咗啲機會，希望嚟緊逐層去修補，更加有方向。」已康復的她更列出4大目標，首先要珍惜結婚21年、默默在身邊守護她的老公鄭子誠，「我同老公關係真係最重要，我咩都唔搞，佢依然穩如泰山咁畀我依靠，更加欣賞佢，佢真係好勤力，1星期做足5晚電台，仲有拍劇同錄音，我會諗大家要互諒互讓，點樣去愛得好啲。」倩怡承認以往比較自我，不太懂得維繫友情，未來希望做得更好，「呢幾年我儲返啲朋友，（劉）美娟識咗好耐，但中間有段時間冇乜聯絡，呢幾年走返埋一齊，佢會聆聽我，聽完又畀意見，又有啲新嘅朋友。」

倩怡感激結婚21年的鄭子誠，一直是她可靠的後盾。

倩怡現在更珍惜跟劉美娟和張崇德夫婦的友情。

餘生做狗狗慈善工作

工作目標方面，倩怡希望餘生多做跟狗有關的慈善工作，因為她養了20多年狗，亦先後送走4隻愛犬，每次都好傷心，特別是7月走的妹妹，令她扚起心肝要多走一步，「要為佢哋做啲嘢先可以過到自己，咁樣佢哋嘅精神就不滅，係佢哋令到我去幫其他狗。」她打算先出書，再希望成立慈善機構，「本書暫名《人狗情深》，希望可以搵到100個故仔，𠵱家聯絡緊啲幫狗嘅組織，希望將來可以發展成一個機構，暫定叫人狗情深慈善基金，令人同狗關係更加親密，甚至帶動多啲領養，但唔簡單希望慢慢成事。」她認為做到以上目標就夠了，當然最想得到更多演戲機會，「呢幾樣總結出嚟，令我人生更加美滿。」

因為愛犬妹妹病逝，倩怡感受很深，很想為狗狗做多啲事。

倩怡接受開電視《健康關注組》訪問，也帶著患病的妹妹，希望留多點回憶。

倩怡養了4隻狗，包括已離世的妹妹（最後），還有小初（第二）、多多（第三）和收養的歡歡（最前）。