專欄│賽程過密或逼球員醞釀罷踢

近排祖利斯古迪代表巴塞隆拿接受訪問，就歐洲足協同國際足協不停擴張賽程，佢話再係咁有一日就會示威。

其實咁多年，兩大足協為咗爭龍頭位，唔妥大家就梗㗎啦，所以各自做大個餅，FIFA就搞世界冠軍球會盃，UEFA就將歐聯變成瑞士制，講到尾兩大機構都係為咗撈油水，各出奇謀啦。不過其實一早有跡可尋，呢幾屆嘅歐霸決賽特登安排喺中東國家舉行，好似西甲咁，聯賽賽會本身冇乜錢，就將近兩屆嘅國王盃決賽擺喺沙特阿拉伯踢，咁要特登飛過去，最辛苦係邊個？當然係啲球員，佢哋嘅舟車勞頓真係多咗好多，休息時間又少，令佢哋好易受傷。

我哋數下近屆運財童子，成日捧杯嘅祖利安艾華利斯，22至23球季可以話相當瘋狂嘅一季，當季曼城成為咗三冠王，阿根廷又係世界盃冠軍，艾華利斯總共踢咗67場波，每個禮拜一周雙賽，真係冇乜點抖，就係球會同世界盃之間輪流比賽；23至24球季，佢又踢咗60場波，試問佢咁辛苦，休息時間又短，其實佢冇受傷已經係好好彩，一個打工仔叫你咁做都死得啦。

古迪同一班球員喺不久嘅將來，或者真係有機會罷踼示威，既然每次講完都無人聽，搞事都唔難預料。Willhappy